Presidenti palestinez Mahmoud Abbas i bëri thirrje të martën Gjermanisë dhe vendeve të tjera evropiane që të njohin shtetësinë palestineze dhe të mbështesin përpjekjet e tij për të zgjidhur konfliktin në Lindjen e Mesme.
“Njohja e shtetësisë së Palestinës do të na ndihmojë dhe do të mbështesë gjetjen e një zgjidhjeje. Gjithçka që duam është liria dhe stabiliteti në një shtet sovran dhe demokratik, ku të gjithë qytetarët do të gëzojnë të drejta të barabarta”, tha ai në një konferencë të përbashkët për shtyp me kancelarin gjerman Olaf Scholz në Berlin.
Ai kritikoi qeverinë izraelite për minimin e përpjekjeve për paqe dhe akuzoi Izraelin për akte të aparteidit kundër popullit palestinez.
Palestina ka qenë nën okupim për dekada, duhet t’i vijë fundi”, theksoi Abbas.
Ai tha gjithashtu se nëse shtetësia palestineze njihet nga disa vende dhe Palestina fiton anëtarësimin e plotë në Kombet e Bashkuara, kjo do t’i hapte rrugën një vrull të ri dhe do të lehtësonte zgjidhjen e konfliktit izraelito-palestinez me dy shtete.
Kancelari gjermane shprehu mbështetjen e Berlinit për një zgjidhje të negociuar me dy shtete, duke kritikuar zgjerimin e vendbanimeve të Izraelit, i cili ka nxitur tensione të reja në rajon.
Scholz vuri në dukje se ata kishin dallime me Abbasin për një sërë çështjesh, duke përfshirë përshkrimin e tij të Izraelit si një shtet aparteidi.
“Unë nuk mendoj se kjo e përshkruan me saktësi situatën,” tha Scholz.
Sipas tij, Gjermania do të vazhdojë të mbështesë përpjekjet ndërkombëtare për një zgjidhje politike të konfliktit në Lindjen e Mesme, por nuk do të mbështesë iniciativat e njëanshme që mund të dëmtojnë këto përpjekje.
“Palestina ka statusin e vëzhguesit në Kombet e Bashkuara, nuk mendoj se tani është koha e duhur për ta ndryshuar atë,” vuri në dukje Scholz.
Qëndrimet e kancelarit gjerman shprehin kompleksin e politikës së Berlinit ndaj Izraelit, pikërisht nga e kaluara naziste ndaj hebrenjve. /tesheshi.com/
