Partia Demokratike ka akuzuar sot kryeministrin Edi Rama dhe ministrin e Punëve të Brendshme, Saimir Tahirin, për bashkëpunim me deputetin Arben Frroku, ku sipas PD-së, d të sipërpërmendurit ndihmuan në arratisjen e të dënuarit dhe me tej në favorizimin e tij për të shmangur drejtësinë. I menjëhershëm ka qenë edhe reagimi i Ministrisë së Punëve të Brendshme në lidhje me këtë çështje.
“Ndalimi i Frrokut në Holandë është bërë që me 6 mars. Por autoritetet shqiptare, kanë vonuar dërgimin e të dhënave në shtetin e BE. Të njëjtët persona, i njëjti mekanizëm, që la në sirtar për muaj me radhë kërkesën e Interpol Bruksel për deputetin e Edi Ramës, vëllain e të dënuarit me burgim përjetë, Mark Frroku. Të njëjtët persona që shërbyen krimin dhe shkelën ligjin duke fshehur kërkesën e Policisë së Brukselit, sigurisht me urdhrin e Tahirit e me lejen e Edi Ramës, edhe këtë radhë, shërbyen krimin duke vonuar dërgimin e të dhënave”, – tha kreu i departamentit të Rendit dhe Sigurisë në PD, Enkled Alibeaj.
Si përgjigje ndaj kësaj deklarate, MPB thotë se nuk është hera e parë që Policia e Shtetit vihet në qendër të akuzave të PD-së, e cila qartazi ka vetëm një qëllim; përbaltjen e punës së Policisë.
Kjo ministri deklaron se Policia e Shtetit është në krye të detyrës, në rrugën e reformimit, në shërbim të qytetarëve pa asnjë dallim, e vendosur të çojë para ligjit, këdo. Në vijim shprehet se dosja “Frroku” dëshmon më së miri vullnetin e Policisë së Shtetit për të bërë detyrën me korrektesë absolute në përputhje me ligjin.
“Autoritetet shqiptare kanë patur komunikim me partnerët dhe sapo ka ardhur sinjali i parë për vendndodhjen e të dyshuarit Arben Frroku, brenda një kohe rekord janë dërguar në Holandë të dhënat krahasuese dhe dje në orët e pasdites është konfirmuar identiteti, u shpall arresti dhe nisi procedura e ekstradimit të tij”, thuhet në deklaratën e kësaj ministrie. /tesheshi.com/
