Austria nuk dëshiron të mbështetet vetëm në Bashkimin Evropian për t’u furnizuar me vaksinë anti-COVID, tha të martën kancelari Sebastian Kurz, duke njoftuar zhvillimin e varianteve të reja të vaksinave së bashku me Izraelin dhe Danimarkën.
“Agjencia Evropiane e Barnave është shumë e ngadaltë në licencimin e vaksinave të reja dhe ka pasur probleme me furnizimin dhe dorëzimin e vaksinave,” tha Sebastian Kurz në Vjenë.
Ai njoftoi se Austria do të punojë ngushtë me Izraelin dhe Danimarkën në zhvillimin dhe prodhimin e një vaksine të gjeneratës së dytë që do të ishte efektive kundër mutacioneve të reja të koronavirusit.
“Ne duhet të përgatitemi për shtame të reja të virusit me kohë. Pandemia do të na ndjekë me mutacionet e saj për ca kohë,” tha Kurz përmes Twitter-it.
Ai mirëpriti “iniciativën e hershme” të Presidentes së Komisionit Evropian Ursula von der Leyen për të prodhuar dhe prokuruar vaksina, por gjithashtu njoftoi hapat e Austrisë në këtë drejtim.
Kurz do të takohet me kryeministrin danez Mette Frederiksen dhe kryeministrin Izraelit Benjamin Netanyahu në Izrael të enjten për të përgatitur hapa për pavarësi më të madhe të këtyre vendeve në prodhimin e vaksinave.
“Izraeli do të shqyrtojë mundësinë e një aleance COVID-19 me Danimarkën dhe Austrinë,” tha kryeministri izraelit Benjamin Netanyahu, vendi i të cilit kryeson në numrin e vaksinuarve.
Para udhëtimit në Izrael, Kurz duhet të takohet me përfaqësues të kompanive farmaceutike dhe shkencëtarë dhe përfaqësues të sistemit shëndetësor.
“Në verë, pas valës së parë të vaksinimeve, ne do të kthehemi në normalitet, por pandemia do të na ndjekë edhe më gjatë,” tha Kurz. /tesheshi.com/
