Pas 5 vitesh në pushtet, Edi Rama po përballet me një sulm frontal, ardhur në vitin e parë të një mandati të dytë të cilin e fitoi me kartën e “tepsisë për skrap”, një kredo politike që ia legjitimoi të drejtën për t’ju besuar dhe një katërvjetësh.
Sulmi është atipik. Ai është pothuajse totalitarist dhe me tipare patologjike. I gatuar në rrjete sociale, ai nuk ka gjasë të përshkohet nga filli arsyes, që më e pakta hem kritikon e hem vlerëson. Jo! Vizioni, reformat, ca punë të tij janë hequr tërësisht nga lista dhe as më shumë e as më pak kërkohet asgjesimi i tij total.
Po cilat janë ato grupime a zëra që e kanë rrethuar kaq keqaz?
E para është opozita, ajo klasike. Klasike si pozicion e jo si metodë. Dihet tashmë profili i PD-së kur është në opozitë. E struktuar mentalisht që të prodhojë vetëm akuza e kurrë ndonjë ofertë, të jetë vetëm denoncuese e kurrë ndërtuese, rënia në opozitë, pavarësisht si e qysh, atë e çakërdis.
Më pas vijnë ca opozita të tjera, mishëruar në personazhe që “shkojnë lehtësisht me mullixhinë” e që kur nuk iu është lexuar ndonjë ideal atdhetar në politikëbërje. Të tillë janë Monika Kryemadhi dhe e gjithë shpura e LSI deri krah Ramës në qeveri, por të çakërdisur po ashtu nga shah-mati mjeshtëror që i la pa tepsi, apo Koço Kokëdhima, deri diku me të njëjtat tipare dhe më të njëtat arsye për t’ju kundërvënë Ramës.
Më pas vjen pjesa e opinionbërësve, atyre që e gatuajnë “me laps” gjithë turfullimin e masës. Edhe te këta rrallë do gjesh ndonjë racional, prej atyre që u ndrit shkrimi nga kritika e jo mllefi. Duke qenë më shumë patetikë se sa shkoqitës çështjesh, një pjesë e tyre i përkasin të hatërmbeturve nga Rama si ish-mik e shok që nuk jua plotësoi pritshmëritë në kushtet e ardhjes në pushtet me ndonjë post në hierarkinë shtetërore. Plus kësaj, edhe pak xhelozi shoqërore me theks shqiptar: u bo ky! Rasti Blushi është më kuptimploti i gjithë kësaj.
Tek ky grupim përfshihet dhe kategoria e artistëve. Nëse ka një terren kur Rama urrehet më së tepërmi, është pikërisht ai nga vjen. Dhe kjo nuk ka të bëjë as me PPP-në e as më kullat. Arsyet gjenden aty ku logjika racionale nuk mund të hyjë. Në oborrin e Teatrit Kombëtar, atje ku më së shumti është luftuar Rama, gjysma e kolegëve nuk e durojnë dot gjysmën tjetër…për arsye nga më pak artistiket.
Grupimi tjetër dhe jo më pas i rëndësishëm, janë personazhet e rrjeteve sociale të cilët kanë arritur të diktojnë nerv në masa.
Disa prej tyre me njohje publike e disa jo, ata falë teknologjisë së komunikimit janë bërë pushkë të mbushura kundër Ramës. Më pak veçime, pjesa më e madhe kanë varfëri të theksuar intelektuale, e në kushte të tjera nuk do i qaste kush. Më pas ka prej atyre që ashtu si ca të tjerë, të mbetur pa gjë nga Rama, kanë vendosur t’ja tregojnë vendin në facebook.
Dhe në fund, si grupim ndër më kryesorët anti-Rama janë dhe ata që e kanë kulturë të menduari që të urrejnë çdo qeveri e çdo kryeveritar. Dhe, të ndihur nga facebook, ata sot janë në ditën e tyre. /tesheshi.com/
