Pas reve të zeza të vëna re në fillim të kësaj jave, e të bëra bashkë dje, pa sjellë ama as vetëtima e as rrebesh, por duke ofruar një qetësi të frikshme në mbrëmje, gazeta Dita çudit sot me një hulumtim në jetën e dikurshme të Tom Doshit.
Vënë në ballinë, në një ndryshim 360 gradë të axhendës së përgjithshme gjatë këtyre ditëve, artikulli i shoqëruar me foton e Tomës dhe të faksimileve nga një gjyq i tij, rrëmuar thellë, flet për një incident këtu e 25 vite të shkuara në qytetin e Durrësit, për dënimin e Doshit, e për mbiemrin e tij që na shfaqet si Dashi, e jo si Doshi, te lista e të burgosurve. Hulumtimi shkon më tej, teksa përmend një përshkrim të gjykatës për deputetin e ardhshëm, ku thuhet shprehimisht, “…i pandehuri ka përbërje të mirë moralo-politike të familjes…,” duke vënë në pikëpyetje pretendimin, gjithnjë sipas gazetës, se Doshi i përket shtresës së ish-të persekutuarve politikë.
Gazeta duket hapur se kërkon ta lërë në hije problematikën e vënë në qendër të vëmendjes, aferën e CEZ-it, duke mëtuar të hapë një front tjetër. Veçse habia nuk vjen vetëm nga Dita, që gjithsesi bën një lëvizje të kuptueshme për pozicionin e saj, por është e mëhershme, që prej mbrëmjes të së enjtes, kur pati një dobësim gjer në thuajse ndërprerje të sulmit mediatik ndaj Metës.
Çudia shkoi më tej, kur Dritan Prifti mungoi në ekranin televiziv, diçka të cilën e pati paralajmëruar ai, e së bashku me të dhe një televizion. I është përplasur dera në fytyrë, apo është vendim i tij personal, nuk dihet ende. Por e vërteta mbetet kokëforte: ka diçka që nuk shkon në thuajse censurën e mbrëmshme.
Ta ketë pasur me kaq afera e CEZ-it? Vështirë ta thuash!
/tesheshi.com/
