Nga Gjergji Koja
Frika nga sulmet terroriste duket se ka detyruar agjensitë ligjzbatuese në Shqipëri të shtojnë masat e sigurisë, veçanërisht në pikat e kalimit kufitar, zonat turistike dhe vendet më të populluara.
Një burim i tha tesheshi.com se prej disa javësh agjentë të anti-terrorit kanë blinduar pikat e kalimit kufitar, madje duke u angazhuar drejtpërsëdrejti në marrjen në pyetje të disa qytetarëve që kanë dashur të vizitojnë Shqipërinë.
Sikundër mësohet. masat më të përforcuara kanë qenë në pikët e Kalimit Kufitar në Morinë dhe në Qafë Thanë, ku rezulton edhe fluksi më i madh i lëvizjeve, ndërsa një shtesë sigurie ka pasur edhe në aeroportin “Nënë Tereza”.
Po kështu në zonat turistike, ku gjatë sezonit veror ka pasur një dyndje të pushuesve vendas dhe të huaj, janë angazhuar agjentë jo vetëm të Antiterrorit por edhe shërbimeve sekrete me synim mbajtjen e situatës në kontroll dhe parandalimin e çdo incidenti që do të cënonte sigurinë kombëtare.
Burimet bëjnë të ditur se gjithashtu nën vëzhgim janë persona me prirje radikale, por kjo është një masë e vendosur prej disa kohësh.
Duket se angazhimi i agjentëve në terren synon mbledhjen e informacionit, i cili më tej vlerësohet dhe përcaktohen hapat që do të ndiqen në vijim.
Nuk dihet nëse këto masa shtesë sigurie kanë të bëjnë me ndonjë informacion konkret apo thjesht janë në kuadrin e ngjarjeve të ndodhura në disa vende të ndryshme europiane, ku rasti më i fundit ishte sulmi në Barcelonë që shkaktoi 14 viktima dhe dhjetra të plagosur.
“Ngjarje të tilla me apo informacion të detyrojnë të marrësh masa shtesë, të cilat kanë si synim parandalimin e çdo akti që mund të cënojë jetët e qytetarëve dhe sigurinë kombëtare”, tha burimi.
Por ndërkohë prej disa javësh në bazë edhe të një urdhëri të Drejtorisë së Përgjithshme të Policisë së Shtetit janë shtuar masat në pikat e kalimit kufitar për të mos lejuar kalimin e shtetasve shqiptarë që nuk respektojnë rregullat e lëvizjes së lirë apo nuk përmbushin kriteret për të udhëtuar drejt zonës Shengen.
Në këtë kuadër duket se ka një gërshetim të planit të masave në pikat e kalimit kufitar, duke rritur në këtë mënyrë kontrollet dhe në raste të veçanta edhe intervistimet, veçanërisht në rastet e shtetasve që tentojnë të hyjnë në Shqipëri dhe nuk kanë një arsye bindëse mbi udhëtimin e tyre. /tesheshi.com/
