Kombëtarja e Shqipërisë, e frikësuar nga incidentet e natyrës nacionaliste gjatë udhëtimit nëpër Maqedoni me autobus është detyruar të marrë masa pa precedentë për ta siguruar ekipin.
Skuadra është nisur në drekë drejt Shkupit dhe si asnjëherë më parë, bashkë me të kanë udhëtuar drejt Maqedonisë edhe forca të një kompanie sigurie private të kontraktuar nga FSHF-ja, të cilët do t’i shoqërojnë kudo lojtarët në shtetin fqinj.
“Është një autokolonë me forca policie që na shoqëron, por edhe një furgon me forca të sigurisë private, që do ta shoqërojnë skuadrën si në rezidencën në Shkup, ashtu edhe në Strumicë”, tregoi për SuperSport shefi i sektorit të Marrëdhënieve me Publikun në FSHF, Gerti Çarçani.
Ndeshja ndërmjet Maqedonisë dhe Shqipërisë në kuadër të grupit për kualifikim në Botëror do të luhet nesër në ora 20:45.
Në mënyrë që të evitohet çfarëdoqoftë incidenti kjo ndeshje është caktuar që të luhet në Strumicë dhe jo në stadiumin e Shkupit. /tesheshi.com/
