Një lobim i fuqishëm nga njerëz me pushtet të madh politik në Prishtinë po ndodh me synimin që EULEX-it, që njihet si Misioni Evropian për sundimin e Ligjit në Kosovës, t’ja hiqen kompetencat ekzekutive, për ta lënë atë thjesht si një mision monitorues, ndryshe një OJQ.
Një burim nga brenda selisë së EULEX-it në Prishtinë, informoi tesheshi.com se me një marrëveshje të re, qeveria e Kosovës ka planifikuar ta realizojë këtë ndryshim statusi të këtij misioni, i cili kërcënon me pranga zyrtarë e qeveritarë të lartë të korruptuar.
Burimi tha se deri dje, qeveria nuk ka pranuar që EULEX-i, me marrëveshjen e re për qëndrim dhe veprim në Kosovë të ketë kompetenca ekzekutive. Por siç tha burimi, me largimin e kompetencave ekzekutive, EULEX-i do të jetë vetëm një OJQ e asgjë më shumë.
“EULEX-i duhet të këtë kompetenca ekzekutive, dhe ky është qëndrimi i BE-së; ndërsa që qeveria e Kosovës kërkon që EULEX-it t’i hiqen kompetencat ekzekutive duke e shëndrruar atë vetëm në monitorues të proceseve të ndryshme në Kosovë, që do të thotë se nuk do të ketë mundësi të hapë në asnjë proces apo të urdhërojë arrestimin e dikujt”, tha burimi,
Sipas tij, për mënjanimin e kompetencave ekzekutive të EULEX-it, më së shumti janë duke lobuar personat në pozita të larta politike të Kosovës, që dihet botërisht se janë të korruptuar dhe se për këta persona EULEX-i ve ka siguruar dëshmitë dhe në të ardhmen e afërt pritet arrestimi i tyre.
“BE-ja është më mirë të largojë misionin e saj (EULEX) nga Kosova, se sa ta kthej atë në një OJQ, që nuk do të këtë kurrfarë kompetence ekzekutive”, ka thënë burimi nga brenda radhëve të misionit të njohur europian, i cili pasoi UNMIKU-in pak vite më parë. /tesheshi.com/
