Ivica Daçiç, njeriu që për momentin ushtron detyrën e kryeministrit të Serbisë, ka mbrojtur idenë që dialogu me Prishtinën të jetë në nivel presidentësh e jo kryeministrash; që do të thotë se Vuçiç duhet të dialogojë me Thaçin.
Duke folur për agjencinë Beta, Daçiç tha se nuk besonte që të ishte ai pjesëmarrës në bisedime. “Kjo është çështje e formatit i cili të jem i sinqertë, kryesisht është përcaktuar sipas funksionit që kryen Hashim Thaçi”, theksoi Daçiç.
“Eshtë më e logjikshme që ky dialog të vazhdojë në formatin e presidentëve”, vijoi më tej ai, duke shtuar se kjo do të ndodhë kur të formohen qeveritë e reja, si në Beograd ashtu dhe në Prishtinë.
Gjykuar nga qëndrimet e Daçiçit, është e qartë se Beogradi kërkon të shmangë si Ramush Haradinajn e si Albin Kurtin, të cilët si emra të mundshëm për të qenë kryeministra të Kosovës, mund të jenë nesër personazhet kryesore në tryezën e dialogut, Prishtinë – Beograd. /tesheshi.com/
