Sekretari i Përgjithshëm i NATO-s Mark Rutte tha të hënën, më 13 janar 2025, se Aleanca e Atlantikut të Veriut është veçanërisht e shqetësuar për situatën si në Bosnje ashtu edhe në Kosovë.
Duke folur në Parlamentin Evropian, referuar situatës së sigurisë në Kosovë, kreu i organizatës më të madhe ushtarake konfirmoi se zyrtarët e NATO-s janë në kontakt të rregullt me Prishtinën dhe Beogradin, veçanërisht në dritën e fushatës zgjedhore në Kosovë për të parandaluar tensionet e mundshme.
“Ne jemi në kontakt si me Kosovën ashtu edhe me Serbinë për të siguruar që zgjedhjet që do të mbahen në fillim të shkurtit të mos çojnë në destabilizim. Kjo është gjithashtu vendimtare,” tha shefi i aleancës. Ai nënvizoi se është e nevojshme t’i kushtohet vëmendje e veçantë rajonit të Ballkanit Perëndimor, të cilin e quajti një lagje kyçe.
Sa për Bosnjen, Rutte nënvizoi se është thelbësore të mos krijohet një vakum sigurie në vend.
Rutte shprehu “shqetësim të thellë” për situatën e sigurisë në kontinentin evropian për shkak të fushatës së udhëhequr nga Rusia.
“Ne nuk jemi në luftë, por nuk mund të themi se jemi në paqe”, tha kreu i Aleancës Euroaltanike, transmeton Radio Evropa e Lirë.
Ai u tha evropianëve se është e nevojshme të investohet në mbrojtje. Ndryshe, theksoi ai, “përgatituni të mësoni rusisht ose ikni në Zelandën e Re”. /tesheshi.com/
