Kreu demokrat Basha përdori sërish frazën e ligjërimit ish-komunist “me ballin lart” në fjalimet e tij post-humbje, mbajtur në kuadër të fushatës për kryetar brenda selisë blu, ku ai pretendon se nuk ka humbur porse fitorja ju vodh.
“Duke nënshkruar për herë të parë në historinë e pluralizmit mbi 12 kontrata midis Partisë Demokratike si forcë e ardhshme qeverisëse dhe organizatave përfaqësuese të mbi 1.3 milionë shqiptarëv që nga ato të biznesit, e të fermerëve, tek ato të persekutuarve e të pronarëve, që nga ato të mjekëve e të të studentëve, tek ato të turizmit.
Pra, një front, një bashkim vullnetesh vizionesh dhe mbi të gjitha pritshmërish për ndryshim.
Por miqtë e mi pavarësisht prej kësaj, nga kjo betejë ne kemi dalë së pari me ballin lart sepse ishte qëndresa jonë dhe vlerat tona ato që shënuan përkundër një makinerie dyfish apo trefish më të madhe të manipulimit se ajo e para katër viteve, jo rënien tonë, as përgjysmimin tonë, por rritjen tonë numerike dhe morale”, tha Basha gjatë një takimi në Lezhë.
Nga ana tjetër, kundërshtarët e tij nuk e pranojnë tezën e “masakrës elektorale”, por thonë se ishte një humbje, për të cilën Basha duhej të jepte dorëheqjen.
Por ndërsa huazon gjuhë proletare, Basha po tenton të bëjë një ngjizje të PD-së së sotme me atë të 90-ës, si një mënyrë inspirimi politik te militanca.
Nën këtë frymë, ai përligji dhe djegien e mandateve në më të fundit takim që pati në kuadër të rizgjedhjes kryetar.
“Siç e dini fare mirë, nën drejtimin tim dhe me vendimet e mia janë ndërmarrë disa prej akteve më të paprecedentë në 30 viteve pluralizëm. Por nuk janë ndërmarrë as për veten time dhe as për fatin tuaj, janë ndërmarrë për ta çliruar Shqipërinë nga ky regjim. Djegia e mandateve kishte një dhe vetëm një objektiv: zgjedhje të parakohshme dhe shembjen një orë e më parë të një parlamenti të dalë nga një tjetër palë zgjedhjesh ilegjitime siç ishin ato të 2017-ës.
Sot është e lehtë të rishkruash historinë sepse siç e thotë populli ‘të mençur pas Kuvendit e trima pas lufte ka boll’, por ne duhet të kujtojmë e duhet të jemi të vetëdijshëm se pa këto beteja do të shkonim duke u zvarritur drejt 25 prillit si bashkëfajtorë dhe si fasadë e regjimit dhe jo ballë për ballë regjimit dhe njësoj e bërë njësh me qytetarët, të cilëve ua kthyem bashkë me mandatet edhe besimin. Se edhe betejat ne do të luftojmë e do t’i çojmë deri në fund për ta dhe familjet e tyre. Nuk ka asnjë shpjegim tjetër sepse njësoj si në 91-shin njerëzit na ndoqën e na besuan”, tha Basha. /tesheshi.com/
