Ambasadorja Yuri Kim është përpjekur të frenojë një ngazëllim të demokratëve mbi ca fraza të saj në një intervistë të mbrëmshme të RTSH, të cilat, nga opozita janë përkthyer si mbështetje e hapur amerikane për të.
Po cila ishin ato fraza që çuan demokratët në “qiell të shtatë”:
“Shqiptarët që takoj kudo në vend më thonë se iu ka ardhur në majë të hundës nga korrupsioni; iu ka ardhur në majë të hundës nga pandëshkueshmëria; iu ka ardhur në majë të hundës nga kriminelët që ulen në parlament.
Epo, ky është momenti.
Ma tregoni me veprime, tregojeni me veprimet tuaja se e keni seriozisht.
Nuk mund të ndodhë që më kërkoni opinionin tim si Shtetet e Bashkuara, unë jua jap dhe pastaj ju vazhdoni të bëni të njëjtën gjë. Nëse doni ndryshim, votoni për ndryshim. Nëse doni kriminelë, votoni për kriminelë. Por ajo që bëni duhet të përputhet me atë
që thoni se doni. Dhe 25 prilli është momenti”, tha Kim.
Por më pas, duke parë se ç’ndodhte në kampin opozitar, Kim reagoi:
“Po shoh disa tituj mashtrues. Ju lutemi shikoni të gjithë intervistën. Nuk mbështet ndonjë kandidat ose parti të caktuar.
SHBA mbështet të drejtën e qytetarëve për të bërë të njohur vullnetin e tyre përmes votës së tyre.
SHBA paralajmëron kundër atyre që e mohojnë këtë të drejtë duke blerë vota ose duke frikësuar votuesit”, shkroi Kim në Twitter. /tesheshi.com/
