Siç u bë e qartë të enjten mbrëma në Top Story, kryeministri Rama e ka përjetuar keq këpucën e znj. Kryemadhi hedhur drejt tij, gjatë seancës për zgjedhjen e një Kryeprokurori të përkohshëm – tashmë një grua, Arta Marku. Ai, përveç statusit politik që ia mveshi gruas në krye të LSI-së, duke e quajtur thjesht “gruaja e Ilir Metës”, pra sipas Ramës pa asnjë aftësi apo meritë për t’u konsideruar si politikane, ka përçuar dhe disa mesazhe jo të zakonta. Rama tha se e kuptonte arsyen e këpucës ndaj tij, si për të lënë të nënkuptuar, se vërtet, znj. Krymadhi dhe partia e saj i tremben reformës në drejtësi, efekteve që do ketë ajo tek klasa politike, në formën e një ndëshkimi.
“Unë e kam shumë të qartë përse këta i kundërvihen reformës. E kam shumë të qartë pse këta janë gati të heqin dhe këpucët, të gjuajnë edhe me këpucë, duke kaluar çdo kufi të fantazisë.
Duke treguar deri ku mund të ulet niveli i shembullit publik të politikanëve, e kam shumë të qartë përse e bëjnë këtë.
Por siç e kam unë të qartë, në mos si unë, që edhe i di gjërat përse e bëjnë këta këtë, populli e ka të qartë sepse e ndjen.
Dilni në rrugë dhe pyesni njerëzit është shumë e qartë.
Këtu asnjë politikan nuk ka paguar çmimin e akteve të tradhtisë ndaj njerëzve në formën e grabitjes. Unë e di që këtu do të paguajnë politikanët, këtë di unë.
Se koha është e tillë, që nuk e lejon më inercinë e këtyre viteve për të treguar, se të gjithe jemi njësoj, jemi zullumqarë, të gjithë dalim e hyjmë në zullum.
Jo mo jo, nuk jemi të gjithë njësoj, nuk jemi të gjithë zullumqarë dhe këtu do ndahet kush është për njerëzit dhe kush është për atë pjesë të izoluar të njerëzve që duhet të paguajnë”, tha Rama.
A është ky një paralajmërim për pranga së afërmi dhe atje ku ato janë dëshiruar nga njerëzit, por vështirë të jenë besuar se mund të ndodhin? Partia e Metës, e nominalisht ai, janë përfolur prej vitesh për një klientelizëm që shkonte deri në korrupsion. Madje kudërvënia ndaj reformës në drejtësi, e fshehur pas merakut për parime kushtetuese, e ka nxjerrë deri diku zbuluar LSI-së.
Rama nga ana e tij, gjer më tani, e vetmja fushë ku nuk ka zhgënjyer, është ajo e ecurisë së reformës në drejtësi, e cila ka patur pikë për pikë vijueshmërinë e e asaj çka ai ka projektuar. Ndaj, është për t’u marrë në konsideratë edhe kur përcjellë mesazhe paralajmëruese ndaj ndonjë epilogu të saj, që, siç e kanë parathënë edhe ndërkombëtarët, patjetër që do shoqërohet me tringëllima prangash, atje dhe tek ata, te të cilët as që ishte menduar deri dje. /tesheshi.com/
