Kandidati konservator në zgjedhjet e ardhshme presidenciale në Francë ka kërkuar falje një ditë më parë në një konferencë shtypi për punësimin e së shoqes si një ndihmëse parlamentare, por nuk ka pranuar që të heqë dorë nga synimi për t’u bërë president i francezëve.
François Fillon, i paraparë si një prej kandidaturave më serioze në zgjedhjet presidenciale, është akuzuar për pagimin e shumave të mëdha parash për bashkëshorten e fëmijët e tij nëpërmjet punëve të sajuara si ndihmësa parlamentarë.
Ai i kërkoi ndjesë popullit francez, ama këmbënguli se vendet e punës për anëtarët e familjes së tij ishin të njëmendta e se ai nuk kishte bërë asgjë të paligjshme.
Fillon i justifikoi veprimet e tij me besimin që kishte te familjarët, ndërsa pranoi se praktika të tilla, sido që të ligjshme, krijojnë mosbesim në ditët e sotme.
“Ishte një gabim. Më vjen keq thellësisht për këtë dhe u kërkoj ndjesë francezëve,” qe një prej frazave të tij.
Kandidati i së djathtës shprehu besimin gjithsesi se votuesit e tij do ta mbështesnin. Megjithatë, mes republikanëve ka zëra që kërkojnë zëvendësimin e tij, pasi sondazhet tregojnë se Fillon nuk pritet të shkojë as në balotazhin e zgjedhjeve presidenciale.
“Ata që duan që unë të tërhiqem janë një pakicë e vogël. Unë jam në fushatën për të fituar,” ka deklaruar Fillon, duke mos treguar asnjë lëkundje në qëndrim. /tesheshi.com/
