Bashkë me termin e shumëlakuar së fundi “fake news”, “lajme të rreme”, është merita e një kandidati për zgjedhjet presidenciale në Francë për nisjen e përdorimit të shpeshtë dhe të një tjetër termi, “fake jobs”, “punë të rreme”.
I pari si favorit në zgjedhjet e prillit dhe të majit në Francë, Fillon po kalon një periudhë të vështirë për shkak të skandalit të njohur tashmë si “Penelopegate”.
Prokurorët francezë kanë vendosur për hapjen e një hetimi zyrtar për pretendimet se Fillon e ka paguar bashkëshorten e tij me mijëra euro si ndihmëse parlamentare, një punë që mendohet se ajo nuk e ka bërë kurrë.
France 24 thotë se hulumtimet e medias franceze nuk kanë zbuluar që e shoqja e kandidatit presidencial të ketë bërë ndonjë punë shtetërore.
Vetë ajo, Penelope Fillon, i ka deklaruar Telegraph-it në 2007-n, “Unë kurrë nuk kam qenë vërtet ndihmësja e tij, apo diçka e ngjashme me këtë.”
François Fillon, që me hetimin e hapur ka marrë një goditje të rëndë në shpresat për t’u bërë president i francezëve, i ka mohuar zërat se ka sajuar punë të rreme për të shoqen.
Ende nuk dihet nëse hetimi do mund të mbarojë përpara raundit të parë të zgjedhjeve presidenciale, ndërsa çdo hetim penal do të pezullohej nëse ai zgjidhej president. /tesheshi.com/
