Facebook njoftoi të shtunën se do të bllokonte përpjekjen e një francezi që vuan nga një sëmundje e pashërueshme për të transmetuar vdekjen e tij drejtpërdrejt në profilin e tij në këtë rrjet social.
Alain Cocq, 57 vjeç, planifikoi të transmetonte drejtpërdrejt ditët e tij të fundit pasi ndaloi së marruri ushqim, pije dhe ilaçe të shtunën.
Presidenti francez Emmanuel Macron e mohoi kërkesën e tij për t’u eutanizuar, duke shpjeguar se ai nuk mund të ishte mbi ligjin.
Cocq dëshiron që Franca të ndryshojë ligjin për të lejuar të sëmurët terminalë të vdesin siç dëshirojnë ata.
Disa grupe, përfshirë Kishën Katolike, kundërshtojnë eutanazinë për arsye morale.
“Rruga për çlirim filloi dhe më besoni, unë jam i lumtur,” shkroi Cocq në Facebook herët në mëngjes të shtunën ndërsa ishte shtrirë në shtratin e tij në shtëpi në Dijon, pasi njoftoi se ai “kishte ngrënë vaktin e tij të fundit”.
“E di që ditët në vijim do të jenë të vështira, por unë kam vendosur dhe jam i qetë,” shtoi ai.
Cocq vuan nga një sëmundje degjenerative, gjë që bën që muret e arterieve të tij të ngjiten së bashku.
Facebook ka bllokuar planin e tij për të transmetuar drejtpërdrejt vdekjen, duke shpjeguar se ai nuk mund të lejojë publikimin e një skene vetëvrasjeje.
“Ndërsa ne respektojmë vendimin e tij për të tërhequr vëmendjen për çështjen e tij komplekse, pas këshillave të ekspertëve, ne morëm hapa për të parandaluar një transmetim të drejtpërdrejtë në profilin e Alain,” i tha AFP një zëdhënës i Facebook.
“Rregullat tona nuk na lejojnë të tregojmë përpjekje vetëvrasjeje.”
Cocq njoftoi se Facebook po bllokonte transmetimin e tij deri më 8 shtator.
Ai u bëri thirrje mbështetësve të tij që të përpiqen të bindin Facebook të ndryshojë qëndrim.
“Tani varet nga ju”, tha ai. /tesheshi.com/
