Sot nisin zgjedhjet rajonale në Francë, të ndara në dy raunde, me të dytin që do të zhvillohet një javë më pas.
Sipas reformës territoriale që hyri në në fuqi më 7 gusht të këtij viti, numri i rajoneve është tkurrur nga 22 në 13, dhe ato kanë tashmë përgjegjësi dhe rol më të madh politik. Rajonet janë tanimë përgjegjëse për mbështetjen e bizneseve lokale të vogla dhe të mesme, dhe ato duhet të paraqesin plane të hollësishme pesëvjeçare për zhvillimin dhe novacionin.
Zgjedhjet do të zhvillohen nën masa të rrepta sigurie, dhe rezultatet e para mendohet të mësohen gjatë mbrëmjes së sotme.
Fushata zgjedhore ka nisur zyrtarisht më 23 nëntor, vetëm dhjetë ditë pas sulmeve vdekjeprurëse në Paris, çka do të thotë se ato pritet të kenë ndikim në rezultatin e zgjedhjeve.
Fronti Kombëtar i Marine Le Pen-it, i njohur për retorikën shpeshherë të ashpër kundër emigrantëve dhe për ngjyrimet islamofobe, shpreson të marrë për herë të parë më së paku kontrollin e një rajoni.
Anketimet i japin Frontit Kombëtar 27 deri në 30 për qind të votave në raundin e parë, duke u bazuar dhe në efektin e ngjarjeve të fundit në vend.
Në një shifër të tillë sillen dhe parashikimet për republikanët e qendrës së djathtë, të udhëhequr nga ish-presidenti Nicolas Sarkozy.
Socialistët francezë, pavarësisht rritjes së ndikimit të presidentit Hollande për shkak të qëndrimit të tij të ashpër pas sulmeve të Parisit, nuk duket të kenë mbështetje të madhe në votime, me anketimet që i tregojnë në nivelin e 22 për qind të votave.
Sipas analistëve, Fronti Kombëtar mund të marrë tre rajone në raundin e dytë, më 13 dhjetor, po qe se partitë e tjera nuk do të bashkëpunojnë mes tyre për ta frenuar atë. /tesheshi.com/
