Papa Françesku ka kritikuar ish-presidentin e SHBA-së, Donald Trump për planin e tij për të dëbuar miliona emigrantë dhe zëvendëspresidenten e SHBA-së, Kamala Harris, për mbështetjen e të drejtave të abortit.
Kur u pyet për zgjedhjet presidenciale në SHBA në një fluturim nga Singapori në Romë, Papa Françesku tha se mospranimi i emigrantëve ishte një mëkat “i rëndë” dhe e krahasoi abortin me “vrasje”. Ai tha se katolikët amerikanë do të duhet të “zgjedhin të keqen më të vogël” në zgjedhjet e nëntorit.
Françesku foli me gazetarët pas një turneu 12-ditor në Azinë Juglindore dhe Oqeani. Megjithëse Papa nuk i përmendi Trump dhe Harris me emër, ai iu referua në mënyrë specifike politikës së tyre. Pavarësisht se i kritikoi të dy kandidatët, ai tha se katolikët duhet të votojnë në zgjedhje.
“Duhet të zgjidhni të keqen më të vogël. Kush është e keqja më e vogël? Ajo zonjë apo ai zotëri? Nuk e di. Të gjithë me ndërgjegje (duhet) të mendojnë dhe ta bëjnë atë”, tha Papa Françesku 87-vjeçar.
Katolikët amerikanë, rreth 52 milionë prej tyre në mbarë vendin, konsiderohen shpesh si votues kryesorë të pavendosur. Në disa shtete, duke përfshirë Pensilvaninë dhe Wisconsin, më shumë se 20 për qind e të rriturve janë katolikë.
Françesku, kreu i rreth 1.4 miliardë katolikëve në mbarë botën, zakonisht është i kujdesshëm në lidhje me zgjedhjet politike kombëtare. Por ai shpesh kritikon ashpër abortin, i cili është i ndaluar në katolicizëm. Ai ka kritikuar më parë dhe retorikën kundër emigrantëve nga ana e Trumpit. Në vitin 2016, Papa tha se Trump “nuk është i krishterë” në pikëpamjet e tij.
E sot ai tha se politikat e të dy kandidatëve janë “kundër jetës”. “Qoftë ai që dëbon emigrantët apo ai që vret fëmijët. Të dy janë kundër jetës”, tha Papa Françesku. /tesheshi.com/
