Të dielën, Papa Françesku u bëri thirrje anëtarëve të të gjitha feve që të jetojnë në harmoni dhe të shmangin fondamentalizmin ideologjik sepse, sicc tha, ai nxit dhunën. Njëherësh, Francesku e quajti veten “trashëgimtar modest i shkollave të lashta të mençurisë”.
Papa Françesku foli në një mbledhje ndërfetare në kryeqytetin mongol, ku ndau një skenë teatri me dhjetë liderë të tjerë fetarë, por për tubime të ngjashme Papa tashmë është sulmuar nga kritikët e tij konservatorë.
Arsyeja kryesore e vizitës së Papës në Mongoli ishte njohja me komunitetin e vogël katolik, me rreth 1450 besimtarë.
Duke qenë se Mongolia kufizohet me Kinën, Papa Françesku shfrytëzoi rastin për t’i dërguar një mesazh Pekinit, me të cilin Vatikani nuk ka marrëdhënie veçanërisht të mira, se Kisha Katolike nuk duhet të frikësohet sepse nuk ka axhendë politike.
Udhëheqësi katolik romak vlerësoi nivelin e lirisë fetare në Mongoli, e cila dikur ishte e shtypur ndërsa vendi ishte nën zonën e ndikimit sovjetik, gjë që iu soll në vëmendje nga një prej priftërinjve budistë që iu drejtuan atij.
“Fetë janë të thirrura t’i ofrojnë botës një harmoni që përparimi teknologjik nuk mund ta sigurojë vetëm”, tha Papa pasi dëgjoi fjalimet e udhëheqësve të tjerë fetarë që përfaqësonin budistët mongolë, myslimanët, ungjillorët, hebrenjtë, ortodoksë, mormonët, hindutë dhe të tjerë.
“Vëllezër dhe motra, sot takohemi si trashëgimtarë të përulur të shkollave të lashta të urtësisë. Në takimin tonë me njëri-tjetrin, ne duam të ndajmë gjërat e shumta me vlerë që kemi për të pasuruar njerëzimin, i cili kaq shpesh është i humbur dhe kërkon vetëm përfitime dhe rehati materiale”, tha Papa Françesku.
Më pas Papa citoi shkrimet e Budës, sipas të cilave “një njeri i mençur gëzohet duke dhënë”, duke shtuar se kjo fjali është e ngjashme me atë të Jezusit “Është më e bekuar të japësh sesa të marrësh”.
Biseda ekumenike
Katolikët me orientim konservator, si peshkopi Athanasius Schneider në shërbim në Kazakistan, e kanë inat udhëheqësin e tyre edhe për pjesëmarrjen në tubime të tilla, të cilat Schneider i quan një
“supermarket fesh” që pakëson statusin e Kishës Katolike.
Megjithatë, Papa Françesku rithekson se i kushton shumë rëndësi “bisedave ekumenike, ndërfetare dhe ndërkulturore”. Për të dialogu “nuk do të thotë mjegullimi i dallimeve, por kërkimi i mirëkuptimit”.
Përveç kësaj, ai dënoi “ngushtësinë, imponimin e njëanshëm, fundamentalizmin dhe kufizimet ideologjike”, duke thënë se të lartpërmendurat “shkatërrojnë vëllazërinë, nxisin tensionet dhe kërcënojnë paqen”.
“Nuk është e mundur të kombinohen besimet fetare dhe dhuna, shenjtëria dhe shtypja, traditat fetare dhe sektarizmi”, tha Papa Françesku. /tesheshi.com/
