Vrapimi i çmendur i Islandës ka ardhur në fundin e vet. Në çerekfinalen e katërt të Euro 2016-tës, francezët janë treguar të pangopur ndaj islandezëve, duke u shënuar katër gola vetëm në pjesën e parë.
Franca kishte traditën në anën e saj, e tash bëhen 17 ndeshje që ajo nuk ka humbur në fushën e vet në aktivitete të mëdha, duke fituar 12 takime e duke barazuar në dy të tjera.
Por një rekord e vuri dhe Islanda, që u bë ekipi i parë në histori që në pesë ndeshje të një Europiani del në fushë me një formacion të pandryshuar.
Me ndeshjen e Islandës ndaj Anglisë në sfond, për francezët ngjante se do të ishte një mbrëmje e vështirë ndaj debutuesve surprizues të këtij kampionati europian. Por jo vetëm që nuk ndodh kështu, por Franca bëhet e para skuadër në Europiane që shënon katër gola në një pjesë të parë.
Giroud, Pogba, Payet e Griezmann shënojnë njëri pas tjetrit në 45 minuta katastrofike për islandezët. Lodhja në takimet e shkuara duket qartë te Islanda, lojtarët e së cilës nuk arrijnë të përqendrohen si duhet.
Me fatin e ndeshjes së shkruar, pjesa e dytë do të ishte vetëm një detyrë që duhej kryer. Sulmuesit i Arsenalit, Olivier Giroud, do të shënonte dhe një herë tjetër për francezët, kurse islandezët do të ngushëlloheshin me dy gola që e bënë më pak dramatike humbjen e thellë.
Rezultati 5-2 u dha të drejtë francezëve të shkruajnë emrin në gjysmëfinale. Një tjetër klasike futbolli na pret, Francë – Gjermani.
Islandezët kthehen në shtëpi me bindjen se dhanë më të mirën, e se çdo gjë e ka një fund herët a vonë. Simpatikë si gjithmonë, të tillë qenë dhe në humbjen në çerekfinale.
Në mesjavë do të zhvillohen dy gjysmëfinalet. Të mërkurën vihen përballë Portugalia me Uellsin, Ronaldo karshi Bale-it, e të enjten është radha e francezëve dhe gjermanëve të masin forcat me njëri-tjetrin. /tesheshi.com/
