130 të vrarët e sulmeve terroriste të 13 nëntorit në Paris u përkujtuan me një ceremoni, ku mori pjesë dhe presidenti francez.
Në një fjalim prej 20 minutash para të pranishmëve, mes të cilëve gjendeshin familjarët e të vrarëve dhe të mbijetuarit e asaj ngjarjeje, Francois Hollande u betua se do ta shkatërrojë ISIS-in.
“Unë u premtoj solemnisht të tërë juve se Franca do të bëjë gjithçka për të mposhtur ushtrinë e fanatikëve që i kanë kryer këto krime.”
Në ceremoninë e përkujtimit u lexuan me zë të lartë emrat e të gjithë të vrarëve dy javë të shkuara, ndërsa flamujt francezë ishin varur në ndërtesat publike.
Por pati dhe familjarë të viktimave dhe të mbijetuar që nuk morën pjesë në ceremoni, duke shprehur me këtë akt pakënaqësinë e tyre për paaftësinë e qeverisë për t’u garantuar siguri qytetarëve. Sipas tyre, qeveria nuk i kishte përmbushur premtimet e bëra në janar, pas sulmit në redaksinë e revistës satirike Charlie Hebdo, për t’i përmirësuar kushtet e sigurisë për qytetarët francezë.
Përgjegjësinë për sulmet e 13 nëntorit e mori ISIS-i. 130 persona mbetën të vrarë në ato sulme, mbi 350 të tjerë u plagosën, e 100 prej tyre po i nënshtrohen ende mjekimit në spitalet e vendit.
Franca e ka zgjatur me tre muaj gjendjen e jashtëzakonshme, dhe qeverisësit e vendit kanë nisur një ofensivë diplomatike në kancelaritë më me peshë të botës për të siguruar mbështetje në luftën kundër ISIS-it. /tesheshi.com/
