Franca do të ndajë njw miliard euro për kërkime deri në vitin 2030 për të parandaluar shkrirjen e akullnajave, mes shqetësimeve në rritje për fenomenin, tha presidenti francez Emmanuel Macron.
Në samitin e klimës në Paris, ai bëri thirrje për një moratorium për shfrytëzimin e shtratit të detit në rajonet polare, të cilin deri më tani e kanë nënshkruar Britania e Madhe, Kanadaja, Brazili dhe 19 vende të tjera, raporton The Guardian.
Macron tha se shkrirja e akullnajave është një kërcënim që është tashmë i pranishëm, duke përshpejtuar dhe kërcënuar miliona njerëz me pasoja të shumta direkte dhe indirekte.
Në Paris, Macron thirri një takim të krerëve të shteteve me territore polare ose vende me akullnaja dhe shkencëtarë kryesorë përpara samitit të klimës COP28 në Dubai në fund të muajit.
Ekspertët thanë në atë takim se temperaturat në Arktik po rriten katër herë më shpejt se mesatarja globale dhe se gjysma e rreth 200,000 akullnajave në botë do të zhduken deri në fund të shekullit.
Shkencëtarët kanë deklaruar se rritja e nivelit të detit është dyfishuar në dy dekadat e fundit.
Franca, e cila ka akullnaja në departamentet e saj alpine, si dhe territor dhe një bazë shkencore në Antarktidë, ka marrë një rol udhëheqës në përpjekjet për të arritur një marrëveshje për të luftuar ndryshimet klimatike në samitin e klimës COP28 të Kombeve të Bashkuara të këtij viti në Dubai, i cili fillon në Emiratet e Bashkuara Arabe në fund të muajit.
Shkencëtarët paralajmërojnë se valët e të nxehtit në të dy polet e Tokës, të cilat u regjistruan për herë të parë vitin e kaluar, janë bërë një dukuri e rregullt.
Ky vit është tashmë më i nxehti i regjistruar dhe ndoshta më i nxehti në 100,000 vitet e fundit, thanë shkencëtarët. /tesheshi.com/
