Francezët kanë nisur të votojnë sot për presidentin e tyre të ri, njeriun që do të marrë postin e mbajtur gjer tani nga Francois Hollande, që as mori mundimin të kërkonte një mandat të dytë.
Votimet e sotme nuk pritet t’i japin fund dilemës, me një balotazh të 7 majit që pret pas dere. Nuk janë zgjedhje kyçe vetëm për Francën, por dhe për Bashkimin Europian. Nga emri fitues do të përcaktohet gjer në njëfarë mase se në ç’drejtim do të fryjë era në unionin e vendeveve europiane, që tani më shumë se kurrë po sheh t’i rrëshqasë toka nën këmbë.
Mjafton të sjellim në vëmendje faktin se Marine Le Pen, kandidatja e Frontit Nacional, një ekstremiste par excellence, e me gjasa të mëdha për të vajtur më së paku në balotazh, ka premtuar për një Frexit, për një referendum të ngjashëm me Brexit-in, për të qëndruar në BE apo për të dalë që andej.
Vetëm katër prej njëmbëdhjetë kandidatëve që votohen sot kanë mundësi të njëmendtë për të shkuar në raundin e dytë të zgjedhjeve presidenciale.
Më i pari është Emmanuel Macron, një ish-ministër, një centrist, udhëheqës i organizmit politik En Marche! Më pas është Marine Le Pen, ekstremistja e djathtë, që së bashku me Macron-in sugjerohet se do të shkojnë në balotazh. Francois Fillon përfaqëson konservatorët, republikanët, në këto zgjedhje, me imazhin të dëmtuar nga shpërthimi i një afere korruptive. I fundit mes të katërve është Jean-Luc Melanchon, një kandidat i së majtës ekstreme.
Sipas anketimeve të fundit, elektorati, veç faktit që ka shumë pikëpyetje për kandidatët, është i përfshirë nga apatia. Në 30 për qind mendohet të jetë numri i atyre që nuk do të votojnë, ndërkohë që numri i të pavendosurve pretendohet të jetë i barabartë me gjysmën e atyre me të drejtë vote.
Mijëra forca sigurie janë angazhuar për të siguruar rendin në këto zgjedhje. Mbi 50.000 forca policore dhe 7.000 forca ushtarake janë shpërndarë anembanë Francës për të shmangur çdo lloj incidenti.
Qendrat e votimit janë hapur në 08:00, për t’u mbyllur në mbrëmje në 20:00. /tesheshi.com/
