Presidenca franceze ka njoftuar se vendi ka dhënë “dritën jeshile” për të shqyrtuar mundësinë e zgjatjes së jetëgjatësisë së reaktorëve bërthamorë deri në 60 vjet ose më shumë, nëse rregulloret e sigurisë e lejojnë këtë.
Deklarata u lëshua pasi presidenti francez Emmanuel Macron kryesoi të parin nga një seri takimesh mbi politikën bërthamore, raporton Reuters.
Macron njoftoi më parë planet për të ndërtuar të paktën gjashtë reaktorë të rinj deri në vitin 2050.
Franca është mbështetur historikisht në energjinë bërthamore për rreth 70 për qind të nevojave të saj, megjithëse kjo përqindje ra vitin e kaluar pasi reaktorët francezë punonin me ndërprerje.
Parashikimet e Le Maire
Në fund të vitit të kaluar, ministri francez i ekonomisë Bruno Le Maire parashikoi një rikthim në energjinë bërthamore për të gjitha vendet kryesore industriale, përfshirë Gjermaninë.
“Nuk ka asnjë komb të madh të industrializuar pa energji bërthamore,” tha Le Maire gjatë një vizite në termocentralin bërthamor Penly pranë Dieppe në bregun verior të Francës.
“Të gjitha kombet kryesore të industrializuara në botë, të gjitha kombet kryesore të industrializuara në Evropë, përfshirë ato që kanë bërë një zgjedhje të ndryshme, një ditë, herët a vonë, do të kthehen në fuqinë bërthamore. Sepse nëse vendet do të përballeshin me zgjedhjen për të braktisur industrinë e tyre ose për të ringjallur energjinë bërthamore, ato do të ktheheshin në energjinë bërthamore”, tha Le Maire.
“Është çështje vitesh, nuk do të ndodhë menjëherë, por jam i bindur se një komb i madh i industrializuar, pavarësisht se cili, do të kthehet në energjinë bërthamore sepse është një kusht për të ruajtur industrinë e tij”, shtoi ai. /tesheshi.com/
