Përfaqësuesja franceze ka mposhtur mbrëmë 3-2 Kamerunin në Nantë, në një ndeshje që mund të kishte përfunduar dhe ndryshe nëse afrikanët do të ishin treguar më të vëmendshëm në momentet e fundit.
Edhe pse jo shumë bindës, e me probleme të dukshme në mbrojtje, francezët arritën të fitojnë në këtë miqësore falë elementëve të spikatur në mesfushë e mbrojtje.
Matuidi do t’i kalonte “gjelat” në epërsi në minutën e 20-të pas një gjuajtje të bukur brenda zonës. Gol që do të zhvlerësohej vetëm pas dy minutash, kur Aboubakar barazoi për miqtë. Sidoqoftë, vendasit e gjejnë edhe një herë avantazhin pak para mbylljes së pjesës së parë. Sulmuesi i Arsenalit, Giroud, i çoi shifrat në 2-1.
Dy golat e tjerë të ndeshjes qenë lënë për në fund të lojës. Choupo-Moting rikthen barazimin për afrikanët në minutën e 88-të, por Dimitri Payet surprizon dy minuta më tutje, kur e dërgon topin në rrjetë nga një goditje dënimi jashtë zonë.
Franca do të luajë dhe një miqësore tjetër më 4 qershor, ndaj Skocisë.
Vend organizator i Euro 2016-tës, përfaqësuesja e Francës gjendet në një grup me Shqipërinë.
Në një tjetër miqësore mbrëmjen e së hënës, Suedia barazoi 0-0 me Slloveninë. /tesheshi.com/
