10 qershor 2016! Franca dhe Rumania janë në barazim, 1-1, kur Payet godet në mënyrë fantastike në minutën e 89-të. “Gjelat” i gëzohen fitores në çastet e fundit të lojës.
15 qershor 2016! Historia përsëritet. Veçse këtë herë viktima është Shqipëria. Ajo ka përballuar për thuajse tërë ndeshjen një Francë të mbështetur nga mijëra tifozë në gjigandin “Velodrome” të Marsejës.
Por nuk është e shkruar që Shqipëria të marrë pikën e parë në një europian. Griezmann, i kritikuar fort për paraqitjen në ndeshjen e parë, është gjendur i pambuluar në zonën kundërshtare në minutën e 90-të. Ai gjuan me kokë dhe e çon topin në rrjetë. Franca ka gjetur avantazhin ndaj Shqipërisë “kryeneçe”, siç e quan një media e huaj. Payet, më pas, në të 96-tën minutë, thjesht vulos rezultatin 2-0.
Franca ka siguruar 6 pikë në dy ndeshje të fituara në minutat e fundit. Në të kundërt, Shqipëria ka 0 pikë pas dy takimeve, e është përfaqësuesja që ka pësuar golin më të shpejtë gjer tani në Euro 2016, nga zviceriani Schar në minutën e 5-të, e më të vonin, nga Payet në minutën e 96-të.
Një Shqipëri tërësisht e pafat, që më së paku ka merituar barazimin në mbrëmjen e së mërkurës. Një Shqipëri që ka goditur dhe shtyllën, e që nuk e ka lënë Francën në pjesën e parë që ta godasë qoftë edhe një herë të vetme portën e saj.
Askush nuk e ka pritur një paraqitje të tillë, e nëse bën dhe krahasimin mes Zvicrës që e dominoi Rumaninë në një pjesë të madhe të lojës dhe Shqipërisë që ndaj Zvicrës qe afër barazimit edhe pse me dhjetë lojtarë, atëherë mund të thuhet pa frikë se kuqezinjtë meritonin shumë më tepër se kaq deri tani.
Franca bëhet ekipi i parë që kalon në fazën tjetër të Euro 2016-tës, edhe pse nuk ka bindur ende, e do duhet të luajë edhe ndaj Zvicrës. Ja ç’shkruan me ironi The Independent për Francën: “Të kishte qenë Cristiano Ronaldo duke parë, do të kishte vënë re se sa e kufizuar ishte njëra prej palëve, e si e festuan golin sikur të kishin fituar Kampionatin Europian!”
E sa për kombëtaren e Shqipërisë, pjesa dërrmuese e shtypit të huaj sportiv, e jo të tillë, e thotë prerë se meritonte shumë më tepër, më së paku një barazim. Marca spanjolle, një prej më cinikeve e më shpotitëseve ndaj Shqipërisë në ndeshjen e parë ndaj Zvicrës, nuk i ka kursyer këtë herë fjalët e mira. Luftë të madhe e ka quajtur ajo lojën e përfaqësueses kuqezi, e të shkëlqyer e ka cilësuar mbrojtjen e saj.
Tani Shqipërisë i duhet të fitojë ndaj Rumanisë për të shpresuar të kualifikohet mes vendeve të treta më të mira. Historiku i përballjeve me rumunët nuk është inkurajues, por me atë çfarë ka treguar Shqipëria në këto dy takime, mund t’ia dalë fare mirë ndaj tyre. Fitorja është e mundur ndaj Rumanisë, duhet vetëm besim.
Të dielën shpresojmë të jetë e treta e vërteta për kombëtaren shqiptare. E meriton vërtet fitoren! /tesheshi.com/
