Të ndaluar të martën teksa udhëtonin nga Marseja për në Lilë, 20 tifozë rusë dëbohen nga Franca. Mes të deportuarve është dhe kreu i shoqatës së tifozëve rusë, Alexander Shprygin, i cili i përket së djathtës ekstreme.
Ai dhe nëntëmbëdhjetë të tjerët janë dërguar në një qendër deportimi, nga ku do të nxirren jashtë Francës brenda pesë ditëve.
Tre tifozë të tjerë rusë janë burgosur për dhunën e ushtruar në Marsejë. Ata janë dënuar me 12, 18 dhe 24 muaj burg, dhe po ashtu do ta kenë të ndaluar të hyjnë në Francë për dy vite.
Zëvendëskryeministri rus, Arkady Dvorkovich, është cituar nga agjencia e lajmeve TASS të ketë thënë se përpara botërorit të 2018-ës do të përpilohet një listë e zezë me emrat e tërë tifozëve që krijojnë probleme e përplasje.
Tifozët rusë do të spikasnin me trazirat që shkaktuan para dhe pas ndeshjes së të shtunës së kaluar mes Rusisë dhe Anglisë. Marseja do të bëhej skenë e përplasjes mes tifozerive. Edhe brenda stadiumit “Velodrome” do të kishte zënie masive mes mbështetësve të ekipeve përkatëse.
Policia franceze ka arrestuar më tepër se 300 persona që prej fillimit të Kampionatit Europian. /tesheshi.com/
