Vetëm një ditë pasi një raport bënte me dije se ushtria siriane kishte sulmuar me armë kimike një fshat një vit më parë, ministri i Jashtëm i Francës i kërkuar Këshillit të Sigurimit të OKB-së ta dënojë përdorimin e armëve kimike në Siri, e të vihen sanksione.
“Dua… një dënim të qartë të këtyre krimeve në një rezolutë nga Këshilli i Sigurimit të OKB-së… që i vendos nën sanksione kryerësit e tyre,” ka thënë në një deklaratë Jean-Marc Ayrault.
“Ushtria siriane dhe DAESH-i kanë përdorur armë kimike kundër civilëve në së paku tre raste. Këto akte janë çnjerëzore dhe të papranueshme.”
“Franca nuk ka për ta pranuar që përdorimi i armëve kimike në Siri… të mbetet i pandëshkuar. Ne u bëjmë thirrje partnerëve tanë në Këshillin e Sigurimit të marrin përgjegjësinë e tyre,” ka shtuar kryediplomati francez.
SHBA-ja, Franca dhe Britania kanë kërkuar në mënyrë të përsëritur sanksione, posaçërisht ndaj regjimit sirian, për përdorimin e armëve kimike, por përpjekjet janë frenuar nga Rusia, një anëtar i përhershëm i Këshillit të Sigurimit, e një aleat i Beshar Esadit. /tesheshi.com/
