Tomislav Nikoliç është veshur ushtarak, ka ngjeshur koburen në brez dhe ka zbritur në bazën ushtarake që ndodhet në Luginën e Preshevës, vetëm pak ditë pas takimit ndërmjet kryeministrave të Shqipërisë dhe Serbisë, ku u shpërndanë mesazhe paqeje dhe stabiliteti.
Në faqen e twitter të Presidentit të Serbisë jepen në mënyrë demonstrative fotot dhe mesazhet politike ushtarake në të ashtuquajturën “Bazën e Jugut” që ndodhet në “Livadhin e Shehut” në Karadak të Preshevës.
Siç bën të ditur Presheva Jonë, gjatë kësaj vizite në Luginen e Preshevës, Nikoliç ka vizituar edhe disa qytete të Serbisë jugore si .Pcinski Prohor, Surdulicën e me pas edhe Vranje, ku do të takohet me krerët e gjashtë komunave të rrethit, si dhe delegatët nga ajo pjesë e Serbisë. Ndërkaq mësohet se do të ketë edhe një takim me Trupin Koordinues të shqiptarëve për Luginen e Preshevës, por për këtë pjesë protokolli është i paqartë.
Ndërkaq, lidhur me këtë vizitë deri tani nuk është prononcuar asnjëri si nga përfaqësuesit e pushtetit lokal dhe as të partive politike.
Kjo është vizita e dytë e një presidenti serb në Luginën e Preshevës, por asnjeherë i pritur nga “qytetaret e tij” shqiptarë e as nga përfaqësuesit e tri komunave shqiptare në Serbi. Heren e fundit Presidenti i Serbisë Tomisllav Nikoliç në Preshevë ka qëndruar më 7 dhjetor të vitit të kaluar, ku ka vizituar filialen e Ndërmarrjes për prodhimin e mobilieve “Simpo”.
/tesheshi.com/
