Në të shtunën e 20 majit janë parë për herë të fundit në fushë dy futbollistë krejt të veçantë, shembullorë në rolet e tyre.
Njëri mbrojtës e tjetri mesfushor, njëri gjerman e tjetri spanjoll, njëri 33 vjeç e tjetri 35 vjeç, kampion njëri e kampion tjetri, Philipp Lahm e Xabi Alonso i kanë dhënë dje lamtumirën futbollit; një tërheqje e paralajmëruar muaj më parë.
Bajern i Mynihut – Frajburg ka qenë ndeshja e fundit për ta, në të fundit javë të Bundesligës. Në “Allianz Arena” ka patur festë, por ka patur dhe lot pikëllimi. Fitorja 4-1 ka përmbyllur një kampionat tjetër të fituar nga Bajerni, të pestin radhazi.
Sezonin tjetër do të jetë ndryshe… do të mungojnë Lahm dhe Alonso.
I pari ka fituar gjithçka me bavarezët, të cilëve iu është bashkuar që 11 vjeç, për të debutuar në 2002-shin.
I dyti pati ardhur tre vite të shkuara te Bajerni, pas një karriere të suksesshme me Liverpulin dhe Realin e Madridit.
“Lahm do të kujtohet si një nga të mëdhenjtë e të gjitha kohërave të klubit,” deklaron Karl-Heinz Rummenigge, një figurë udhëheqëse e skuadrës bavareze, një ish-lojtar i shkëlqyer.
Po Rummenigge e çmon kështu spanjollin: “Alonso është një nga blerjet tona më të mira të viteve të fundit, një gjetje vërtet me fat, një takticien tërë dhunti, një njeri tejet inteligjent, një nga lojtarët më të pandërlikuar që kam parë ndonjëherë.” /tesheshi.com/
