E vendosur në anën perëndimore të ishullit grek të Rodit, rreth 25 kilometra larg qytetit, “Lugina e Fluturave”, e njohur edhe si “Petaloudes Valley”, gjatë gjithë verës është një oaz ngjyrash. Janë mijëra e mijëra flutura-tigër (të llojit Panaxia quadripunctaria), të cilat popullojnë luginën nga muaji korrik e deri në shtator, të tërhequra nga aroma e ëmbël e pemëve që ndodhen në këtë zonë si dhe mikroklima e lagësht dhe e freskët.
Fluturat, të cilat kalojnë gjithë verën në freskinë e luginës, çiftohen gjatë javëve të fundit të gushtit dhe në muajin e shtatorit. Pjesa më e madhe e femrave fluturojnë larg, në disa raste më shumë se 25 kilometra, për të depozituar vezët në vende të sigurta, mundësisht mes shkurreve dhe bimëve, e më pas ngordhin.
Në fund të stinës së shirave, larvat shndërrohen në flutura. Të tërhequra nga aroma e rrëshirës dhe nga lagështia e gjeneruar nga rrjedha e ujit, ato kthehen në luginë dhe cikli nis sërish, duke u përsëritur edhe një herë./tesheshi.com/
