Fundi i ndeshjes Angli – Zvicër ka sjellë skenën e një takimi të ngrohtë mes dy kundërshtarëve në fushë në 120 minuta, Xhaka dhe Saka, dikur shokë skuadre te Arsenali.
Anglezi, shënues i golit të barazimit, ka dhe një vlerësim me superlativa për kosovarin lider të skuadrës helvete, i tillë dhe te Leverkuseni në kampionatin gjerman.
“Ai është një lojtar i shkëlqyer, por mbi të gjitha një njeri i mrekullueshëm. Përulësia që tregoi pas ndeshjes kur erdhi dhe na takoi të gjithëve tregon shumë për karakterin e tij. Kam shumë respekt për Xhakën dhe e admiroj atë dhe skuadrën e Zvicrës”, u shpreh Saka.
Anglia arriti të skualifikonte Zvicrën vetëm më anë të penalltive, ku Xhaka num gjuajti, duke zbuluar diçka mbi veten e tij vetëm pas përfundimit të lojës.
“Tani mund ta them. Fatkeqësisht, të hënën bëra një skanim MRI, i cili zbuloi një fibër muskulore të këputur në aduktor. Kisha ndjenjën se skuadra kishte nevojë për mua. Doja gjithashtu të dërgoja një sinjal se jam ende gati dhe mund të ndihmoj edhe me dhimbje.
Ju mund të shihni se unë nuk mund të luaja me topa të gjatë ose të bëja një goditje në portë. Por gjithçka tjetër në fakt shkoi mirë”, ka deklaruar Granit Xhaka, motori i Zvicrës.
Nga ana tjetër, Xherdan Shaqiri, futur në fund të pjesës së dytë, për pak se nuk shënoi një gol spektakolar nga goditja fundore, duke tronditur traversen e portës angleze.
Ishte një ndeshje ku vetëm fati i nxorri fitues anglezët, me një Zvicër që luajti si e barabartë, madje dhe me një lloj epërsie në shumë minuta, ndaj n/kampionëve të Europës. /tesheshi.com/
