Një foto e numrit dy të LSI-së, Luan Ramës me presidentin rus Vladimir Putin, ka “trimëruar” përkrahësit e LSI-së që duket kanë gjetur një “strehë ndërkombëtare” për reagimet folklorike siç ndodh në Shqipëri për të gjetur aty-këtu, një atu për veprimet e brendshme.
Nënkryetari dhe kreu i grupit parlamentar të partisë së Monës, Luan Rama, ka marrë pjesë në punimet e Unionit Ndërparlamentar Botëror, një organizatë ndërqeveritare pa asnjë rëndësi reale, të cilën kreu i Kremlinit e ka realizuar në qytetin e tij ku ka qenë edhe kryebashiak, për të promovuar ndërkombëtarisht Rusinë, si por edhe për të dhënë një mesazh politik në një auditor ndërkombëtar.
Në këtë auditor, që normalisht nuk ka marrë pjesë asnjë figurë e pushtetshme perëndimore, ylli i shfaqjes ka qenë natyrisht Vladimir Putin.
Dhe në këtë atmosferë frenezie, ku parlamentarë nga vendet aziatike dhe ato të botës së tretë shtyheshin që të gjenin të lirë “Carin rus” për të bërë një selfie, ka qenë me fat ai, politikani shqiptar Luan Rama, një nga krerët e LSI-së, partia e të cilit në të kaluarën e afërt është përfolur për qëndrime pro-ruse.
Por kjo nuk ka kompleksuar fare as drejtuesin e deputetëve lësëistë e as përkrahësit e kësaj partie që përgjithësisht identifikohen në rrjetet sociale me foton e Imam Aliut, që bektashinjtë e paraqesin si ikonë gjithandej.
Vetë Luan Rama, i ka dhënë një notë narrative, madje tejet protokollare, fatit të tij apo momentit të fotos me kreun e Kremlinit.
“Shën Petërsburg: me Presidentin e Federatës Ruse, Vladimir Vladimiroviç Putin, në qytetin e tij të lindjes, pas seancës solemne të Asamblesë së Përgjithëshme të Unionit Ndërparlamentar”, shkruan Luan Rama.
Por për përkrahësit e tij kjo është një “hakmarrje politike”. “Po u çmendkërka Rama”, thotë njëri që duket se e ka fjalën për kryeministrin.
Por këtu çështja është pak më shumë se një tifozeri e çastit, pasi përbën një sjellje politike të një figure mjaft të lartë të partisë së dytë opozitare në vend.
Një foto edhe selfie e çastit, më shumë se një sjellje e çlirët, është edhe moment politik. Një foto me Presidentin Putin, edhe pse nuk mund të ketë asgjë negative, përbën gjithsesi një fakt jo pak të rëndësishëm politik, që në fund të fundit ja vlen të komentohet, edhe pse me masë.
Luan Rama, kreu i një force politike të një shteti të NATO-s ka dalë si adhurues i një lideri të një vendi që është në konflikt me NATO-n.
Me Putin takohet edhe Aleksandër Vuçiç, por e ka aleat. Takohet edhe Donald Trump, por në pozita krejt të tjera. Ah, nëse Putin do ta priste Luan Ramën, përkatësisht kreun e delegacionit shqiptar në Shën Pjetërsburg, në një audiencë edhe pse 5-minutëshe, pas kalimit nga kanalet diplomatike, kjo do të ishte një vlerësim i rëndësishëm për delegacionin shqiptar nga vendi pritës, gjë jo e vogël.
Por në këtë rast, kemi të bëjmë me një sjellje prej adhuruesi politik të Luan Ramës, që ka shumë gjasa të prodhojë diskutime politike në ditët në vijim. Dhe këtë, kreu i deputetëve të LSI-së duhet ta dijë mjaft mirë dhe ndoshta dh e ka provokuar qëllimisht. Fundja, nëse do ta kishte thjesht foto private, pse e bëri publike? /tesheshi.com/
