“Lufta e ftohtë” Rama-Meta zhvendoset nga fronti i Ministrisë së Brendshme në atë të Ministrisë e Jashtme.
Qarqe politikës së Tiranës kanë publikuar një foto ku Berat Buzhala, botuesi i Express-it së Prishtinës ndodhet në kafen e hotel Rogner me kreun e Kuvendit, Ilir Meta.
Pas këtij takimi Buzhala sulmoi fort Ramën për takimet në Beograd.
Rama dhe Meta zhvilluan takime paralele diplomatike të rëndësishme: njëri në Serbi dhe tjetri në Greqi.
Ndërkohë që Meta u sulmua fort se prishi politikën zyrtare në Athinë duke mbajtur krahun e grekëve, qarqe të larta në Prishtinë, sidomos mediatike, sulmuan Edi Ramën për qëndrimet e tij për Kosovën në Serbi.
Ishte ministri i Jashtëm i Kosovës, Enver Hoxhaj që pati deklaratat më të ashpra ndaj Ramës për t’u ndjekur më pas nga Berat Buzhala, ish-deputet dhe gazetar.
Ndërkohë, media pranë Metës në Tiranë kanë shkruar se kreu i Kuvendit po a nxjerr jashtë loje diplomacinë Bushatit dhe ndërmjet të dyve ka një luftë të fuqishme të pashpallur.
Sikur të mos mjaftonte kjo, një këshilltar i Metës ka publikuar një status në rrjetet sociale ku e quan Bushatin “bastard dhe të paaftë”.
Më pas këshilltari e ka hequr postimin dhe ka deklaruar se i kanë ndërhyrë në faqe pa lejen e tij.
Por në të gjithë këtë tollovi sulmesh, duket se ka një ndikim që nuk mund të kalojë pa vënë re: Hashim Thaçi po përflitet gjithnjë e më shumë si një shtetar që do të gjykohet zyrtarisht nga Gjykata Speciale për Kosovën. Dhe sipas të gjitha gjasave ai do të japë dorëheqjen.
Akuzën zyrtare për këtë arsye ia ka bërë Serbia dhe Thaçi i ka kërkuar kryeministrit Rama që të ndërhyjë tek Vuçiç që t’ia heqin emrin në listë duke premtuar edhe konçensione politike.
Por siç mësohet, as Rama e as Vuçiç nuk kanë këllqe pasi prapa janë amerikanët.
E ashtu si Thaçi, edhe Meta është përfoluri kryesor si një i hetuar i mundshëm i Prokurorisë Speciale të Shqipërisë që pritet të ngrihet së shpejti në kuadër të reformës në drejtësi.
Pra të dy kanë interesa të ngjashme për të shpëtuar nga akuzat dhe për këtë po investohen fuqishëm për të sulmuar Edi Ramën – që duket se e ka të fortë mbështetjen e perëndimit – madje edhe për ta piketuar së bashku me Vuçiç.
Asnjë gjë nuk është rastësi dhe lufta brenda llojit duket se do të shpërthejë shumë e fuqishme, pas së cilës KPD-ja e famshme e Nanos do të duket një lojë kalamajsh… /tesheshi.com/
