Një raport i ri i Organizatës Botërore të Shëndetësisë gjeti se gati një e katërta e fëmijëve nën pesë vjeç vdesin nga kushte të parandalueshme të ndotjes mjedisore.
Një vajzë që ecën përmes maleve me mbeturina, një djalë zhytur deri në fyt në ujëra toksikë – këto fotografi tregojnë vetëm disa nga fëmijët e ekspozuar ndaj kushteve të ndotjes mjedisore që mund të jenë fatale për to.
Të paktën një ndër katër vdekje të fëmijëve nën pesë vjeç, pothuajse 1.7 milionë fëmijë, mund t’i atribuohet ndotjes, sipas raportit të sapopublikuar të OBSH-së. Mungesa e aksesit për ujë të pijshëm vendos në një pozicion të brishtë mbijetese fëmijët që preken nga sëmundje të parandalueshme si diarrhea, malarja dhe pneumonia.
Rreth 570 mijë fëmijë vuajnë, gjithashtu, nga ekspozimi ndaj ndotësve të ajrit dhe ndotjes së mjediseve të brendshme të jetesës, si nga tymi i cigares dhe zjarri i gatimit, duke sjellë një mundësi gjithnjë e më të madhe që ata të zhvillojnë sëmundje kronike të sistemit të frymëmarrjes në fazat e mëvonshme të jetës.
Vendet në zhvillim janë më të rrezikuarat ndaj ekspozimit të ajrit të ndotur. Një studim i vitit 2014 nga OBSH gjeti se në këto vend, 98 për qind e qyteteve me më shumë se 100 mijë njerëz nuk kishin akses për ajër të sigurtë. Delhi në Indi vlerësohet të jetë qyteti më i ndotur në botë.
“Një mjedis i ndotur është vdekjeprurës – sidomos për fëmijët e vegjël”, thonë zyrtarët e OBSH-së, në një deklaratë. “Organet e tyre të paformuara ende, sistemi imunitar i brishtë i bëjnë sidomos të prekshëm nga ajri dhe uji i ndotur”.
Gratë që jetojnë në kushte të pasigurta mjedisore gjatë shtatzanisë kanë gjithashtu mundsi më të mëdha për të lindur fëmijë para kohe. Raporti zbulon se 270 mijë fëmijë në botë vdesin brenda muajit të parë të jetës nga ekspozimi në mjedise të rrezikshme të parandalueshme si ajri dhe uji i ndotur.
Fëmijët për më tepër, janë të rrezikuar edhe nga përdorimi i papërshtatshëm i mjeteve elektronike, që mund të rezultojë me përhapjen e kimikateve toksike në mjedisin ku ata jetojnë. Toksinat si arseniku, dhe materiale të tjera të rrezikshme pengojnë zhvillimin e tyre dhe rrisin nivelin e sëmurjes me kancer.
Ndërkaq, sasia e mbeturinave të grumbulluara në mënyrë të papërshtatshme vlerësohet të rritet me 19 për qind deri në vitin 2018, duke shkuar në një masë totale prej 50 milionët tonë kubë.
OBSH ka dhënë rekomandimet për përmirësimin e kushteve të jetesës për fëmijët, ndërsa aktualisht po punon me vendet në zhvillim për të siguruar akses më të mirë në shërbimet jetike.
Përgatiti: Juli Prifti – /tesheshi.com/
