Për berberin kanadez, Franz Jakob është mëse normale që gjatë punës të përballet me episode të çuditshme, si për shembull klientë të pavendosur rreth modelit të flokëve që duan të provojnë, djem tekanjozë që nuk kënaqen kurrë dhe duan gjithmonë të eksperimentojnë tendenca të reja etj.
Por, mëngjesi i asaj dite do të ishte special pasi në sallonin e tij do të trokiste një vogëlush 6-vjeçar special, Wyatt Lafrenière i shoqëruar nga mamaja. Wyatt është diagnostikuar me autizëm që në moshën 2-vjeçare dhe që atëherë ka qenë e vështirë për të, të krijojë marrëdhënie sociale dhe të mund të komunikojë me botën që e rrethon.
Eksperienca tek berberi ka qenë gjithmonë e frikshme pasi vogëlushi 6-vjeçar trembej nga personat e panjohur dhe nuk qëndronte kurrë në vend. Por, për një profesionist si Franz çelësi i sekretit për të kryer sa më mirë punën e tij qëndron tek komunikimi me klientin dhe përshtatja me të.
Kur djaloshi u ngrit nga karrikja për t’u shtrirë në tokë, ai bëri të njëjtën gjë. Momenti i kapur në foto nga mamaja Fauve Lafrenière do të bëhej shumë shpejt viral në rrjete sociale dhe berberi do të konsiderohej si miku gjigant i vogëlushit./tesheshi.com/
