Është konfirmuar dhe njëherë prirja e kahershme e Ramës për të thithur sa më shumë financime nga bota arabe, datuar kjo që në kohën e të qënit kryebashkiak i Tiranës, ku arabët iu “bënë krah” në shumë projekte, si dhe në kompensimin e të gjitha dëmeve në përmbytjen e Tiranës së Re nga hapja e digë së liqenit, në vitin 2002, me anë të një shoqatë islame.
Së fundi në Vlorë, do jenë pikërisht arabët, më saktë Fondi Saudit, që do financojë ndërtimin e “Lungomare 3” me një gjatësi rreth 20 km, që nis nga tuneli i Ujit të Ftohtë e deri në Orikum, një projekt që pritet të finalizohet para verës të vitit 2024, siç raporton ATSH. Pra është fjala për të gjithë zonën e Radhimës, për fat, e pacenuar nga ndërtime.
Për qeverinë shqiptare, investimi saudit në këtë zonë do e transformojë atë në një zonë shërbimi me 5 yje.
“Gjithë zona ka marrë një vlerë të jashtëzakonshme nga pikëpamja e vlerës ekonomike. Është një projekt që ka dezenjuar një vlerë turistike me shërbime me 5 yje që nga hotelet me 5 yje, marina dhe deri tek aeroporti”, tha Blendi Klosi, drejtues politik PS-së për Qarkun Vlorë.
Nga ana tjetër. ambasadori saudit në Tiranë, Faisal Hefzi vlerësoi rëndësinë e këtij projekti, që siç tha, reflekton vendosmërinë e qeverisë saudite, nëpërmjet Fondit, për të mbështetur projektet e zhvillimit në shtetet simotra dhe mike, përfshirë Shqipërinë, me të cilën Mbretëria ka marrëdhënie të ngushta. /tesheshi.com/
