Tashmë, raportimi më i saktë i asaj ç’po ndodh në Siri, veçanërisht në Halep, qytetin simbol të konfliktit, po vjen nëpërmjet fotove. Por kësaj here, aparatet e fotoreporterëve nuk kanë fiksuar ndonjë fragment dramatik njerëzor, por një skenë që mund të përkthehet fare mirë si “etja për jetë në Halep”, ose që “jeta në Halep ngadhnjen mbi gërmadha”.
Një grup fëmijësh kanë zgjedhur të “bëjnë plazh” në kraterin e krijuar pas një bombardimi të forcave qeveritare, të mbushur me ujë.
Qendra mediaatike pro-opozitare e Halepit tha se krateri ndodhet në zonën Sheikh Saeed.
“Çfarëdo që ka bërë Assad në Halep, jeta nuk ka mbaruar. Fëmijët tentojnë të rinisin një jetë të re në çdo vend që shkatërrohet nga raketat e tij”, shkruhet prej tyre.
Afër 2 milion njerëz janë bllokuar nga luftimet në dhe rreth Halepit.
OKB ka bërë thirrje për një armëpushim 48-orësh për të mundësuar shpërndarjen e sigurt të ushqimit dhe barërave në pjesët jugore të qytetit, të kontrolluara nga forcat kryengritëse dhe pjesën perëndimore të kontrolluar nga qeveria.
Fotografitë e djemve duke notuar janë bërë të mërkurën, dy javë pas fotografisë në Qendrën Mediatike të Halepit me vogëlushin e mbuluar nga pluhuri i bombardimeve dhe i lënduar po ashtu, tek po qëndronte në një autoaumbulancë. /tesheshi.com/
