“Krenar të mos jesh si ju!” Kjo ishte pritja që do t’u bëhej lojtarëve të Realit në “Vicente Calderon”, në përgjigje të një banderole me një pyetje ironike të shpalosur një javë më parë në “Santiago Bernabeu”.
Më pas do të niste stuhia e vendasve, që për pak minuta do t’i bënte qull lojtarët e ekipit të të njëjtit qytet, armiq në fushë.
Stuhi që do të pasohej në fund të ndeshjes nga shkrepëtimat e vërteta në qiell, nga një rrebesh që këtë herë qe rezervuar për lojtarët e Atletikos, të demoralizuar.
Reali ka ditur t’i ikë ferrit të “Vicente Calderon”-it, këtij terreni sportiv të cilit tifozët e Atletikos i thonë shtëpia e tyre.
Reali për të katërtin sezon radhazi e ka lënë duarthatë Atletikon në Champions League. Por askush nuk do mund ta harrojë mbrëmjen e 10 majit.
Atletiko kryesoi 2-0 brenda 16 minutave. “Ato 30 minuta të para do të mbeten në historinë e stadiumit. Ishte një ndeshje e jashtëzakonshme….” Diego Simeone thotë kështu, i pezmatuar, por i kënaqur me shpirtin luftarak të lojtarëve të tij.
Goli për Realin do të vinte nga një veprim fantastik i Karim Benzema-së; gol që do t’u priste krahët vendasve.
Humbja 2-1 i mundësoi Realit vajtjen për të dytin sezon rresht në finalen e Champions League-s.
Sido që të jetë finalja ndaj Juventusit, asgjë nuk do të ngjajë me këtë gjysmëfinale në “Vicente Calderon”. /tesheshi.com/
