Një tubim shefash të teknologjisë në një fotografi të vetme. Sa për t’ua zbukuruar pamjen, dhe për ti mbyllur gojët e liga, në foto ishin fotoshopuara edhe dy gra.
Fotografia e retushuar u dallua shpejt dhe përpjekja e tyre për të mos u dukur mizogjinist shkoi huq.
Pamje me plot burra nga ngjarjet e teknologjisë nuk janë të pakta. Ndonëse gratë shkëlqejnë në udhëheqjen e bizneseve të modës, ushqimit, filmit, kozmetikës, edukimit, mirëqenies dhe avokimit, duket se ana e butë po i vret ato më së shumti.
Kompanitë si Google dhe Facebook kanë përmbysur industritë e tjera, kanë ndryshuar mënyrën se si jetojmë dhe formësojmë të ardhmen. Megjithatë, këto kompani kurrë ishin në gjendje të punësojnë një forcë pune që përfaqëson denjësisht klientet gra.
Në mbarë industrinë e teknologjisë, gratë përbëjnë vetëm një të pestën e punonjësve.
Viti 2014 ndezi pak shkëndija si pasojë e një presioni të madh nga aktivistët. Me këtë rast, shumë kompani të teknologjisë për herë të parë filluan të publikonin raporte për diversitetin gjinor të punonjësve. Në atë kohë, dukej si një përpjekje e mirëfilltë pranimi i fakteve se nuk ka diversitet gjinor.
Për të balancuar shifrat, kompanitë punësuan gra në pozita të larta, por asnjëherë në ato të CEO-së.
Edhe sot gratë janë shumë të nënpërfaqësuara në rolet e lidershipit dhe teknologjisë: punët me paga të larta dhe prestigjioze shkojnë për burrat.
Raporti më i fundit i diversitetit të kompanisë Facebook tregon se kompania ka vetëm 15 % të të punësuarve gra. Megjithatë, Facebook nuk ka komentuar mbi të dhënat e tilla.
Teknologjia nuk është i vetmi sektor që shkëlqen në shpërfaqjen e pabarazisë gjinore; shumë industri nuk kanë përfaqësim të dukshëm të grave. Nga 500 kompani të mëdha në botë, vetëm 26 udhëhiqen nga gratë.
Fotografia ku gratë ishin retushuar sa për të paraqitur diversitet gjinor nxiti kritika të vazhdueshme ndaj kompanive të mëdha të teknologjisë. Por ato e shohin mos përfaqësimin e grave si një problem të paqartë optik, e jo një çështje reale që duhet të zgjidhin.
Shumë prej tyre ankohen se ka pak gra që studiojnë teknologjinë dhe inxhinierinë, por kjo del një “fake news” përballë raporteve që dalin nga statistikat e universiteteve.
Kompanitë e teknologjisë mbajnë brenda mureve të tyre disa nga mendjet më inovative në botë. Ato megjithatë nuk kanë arritur të kuptojnë se një ambient i vendimmarrjes ku shihen vetëm kollare mund të mos përfaqësoj denjësisht klientët. Pasi kur vjen puna te radhët e blerjes së pajisjeve të fundit, nuk janë vetëm kollaret, por takat janë ato që presin për të pasur në duar një produkt inovativ për të cilin kanë lexuar, e mbase kanë mundur edhe ta bashkë themelojnë.
Përgatiti: Arbnora Avdiu-Hoxha
/tesheshi.com/
