Nga Donat Maloku
Garë e nxehtë pritet të jetë në përballjen finale të Kuvendit të VIII-të zgjedhor të Lidhjes Demokratike të Kosovës ku 355 delagatë të LDK-së ditën e diel më 31 maj, do të zgjedhin organet drejtuese dhe kryetarin e ri .
Në garë për të marr drejtimin e partisë janë, kryetari aktual i partisë Isa Mustafa, kryetari i nderit Fatmir Sejdiu, deputetja Vjosa Osmani dhe Lutfi Haziri.
Njohësit e rrethanave politike në Kosovë parashohin garë të fortë në mes kreut aktual Isa Mustafa dhe ish kryetarit Fatmir Sejdiu për të marr timonin e këtij subjekti politik. Ata thonë se pritet të ketë tensione por se nuk pritet të ketë i ashtuuquajturi ‘Kuvendi i Karriegeve’.
Njohësi i rrethanave politike, Astrit Gashi në një prononcim për portalin “Te Sheshi”, ka thënë se deri në ditën kur do të mbahet Kuvendi i kësaj partie nuk mund të thuhet se cili nga kandidatët që janë në garë do të fitojë.
“Gjasat sigurisht se i kanë më të mëdha ata që e kanë në duar pushtetitn edhe në vend por edhe në parti dhe që kanë mundësi të joshin me oferta delegatët, por LDK është në një udhëkryq dhe delegatët mund t’i refuzojnë mekanizmat e joshjës dhe të vendosin për një parti me të ardhme të re e të ndëshkojnë të kaluarën me humbje të kësaj partie. E kaluara dhe humbjet asociohen me të dy të parët (Sejdiun dhe Mustafën), ndërsa e ardhmja me të rinjtë pra me Vjosa Osmanin”, ka thënë Gashi.
Analisti politik Bajrush Morina, thotë se është në duart e 355 delegatëve të Kuvendit të LDK së se kush do të zgjedhet në krye të kësaj partie.
“Në këtë Kuvend do të ketë tendosje, nervoza tensione por jo në nivelin e Kuvendit që njihet si Kuvend i karrigeve. Të gjithë kandidatët i kanë vlerat e tyre por Isa Mustafa ka përparësinë për shkak të pozicionit të tij si kryeministër”, ka deklaruar Morina për portalin “Te Sheshi”.
Analisti tjetër Blerim Burjani, thotë se është e shëndeteshme që në garë janë katër candidate për të marr kreun e partisë.
“LDK duket të jetë në krizë për lider, sepse as kryetari aktual nuk ka treguar ndonjë sukeses në udhëheqje të LDK-së. Shpesh i kontestoohet pozita e liderit duke iu përsëritur refreni se ai ka humbur tre zgjedhje me parë. Sidoqoftë ka sens demokracia në LDK me këtë numër të kandidaturave, Isa mund të duket favorit nëse nuk do të ketë ndonjë befasi tjetër. Prej kandidatëve të tjerë mund të thuhet se Fatmir Sejdiu duket të jetë kundërkandidati më serioz nëse veç ai ka pranuar kandidimin. Të tjerët kanë vullnet pozitiv e disa e kanë për me dal në mjete të informimit por jo që mund të jenë kandidat të denjë të Isa Mustafës”, thotë Burjani.
Ish nënkryetari i LDK-së, Eqrem Kryeziu, thotë se anëtarësia e LDK-së e pret këtë Kuvend me interesimin më të madh deri më tani.
“Po fitoi nëntoka komuniste dhe krimi ekonomik, praktikisht do të jetë një shtysë e madhe në tatpjetën që ky subjekt ka marrë tashmë. A do të ndalet ky erozion? Komunistët nuk ndalen deri në shkatërrim”, ka thënë Kryeziu.
Ja si e parasheh Statuti i LDK-së zgjdhjen e kryetarit
Mënyra e zgjedhjes së organeve të partisë, përfshirë edhe kryetarin e partisë është e rregulluar me Statutin e LDK-së. Me Nenin 25 të Statutit të LDK-së është përcaktuar mënyra e zgjedhjes së kryetarit të LDK-së.
Neni 25
25.1 Kryetari i LDK-së zgjidhet në Kuvendin e LDK-së, me votim të fshehtë, me më shumë kandidatë.
25.2 Kandidimi për kryetar bëhet në Kuvend. Kandidatura miratohet me 50 për qind plus 1 të delegatëve të pranishëm.
/tesheshi.com/
