Nga Blendi Gashi
Për herë të parë në Kosovë është krijuar një front i përbashkët opozitar i përbërë prej tri partive politike, të cilat kërkojnë dorëheqjen e menjëhershme të qeverisë “Mustafa” dhe vendi të shkoj në zgjedhje të reja të jashtëzakonshme.
Opozita po kërkon nga qeveria që të reflektojë dhe t’i shfuqizojë marrëveshjet që ka arritur në Bruksel, e konkretisht marrëveshjen për Asociacionin e Komunave me shumicë serbe. ‘Vetëvendosje’, AAK dhe NISMA për Kosovën kanë bllokuar punën e Kuvendit, duke thënë se nuk do të lejojnë që institucioni ligjvënës të punoj derisa kryeminsitri Isa Mustafa të tërheq nënshkrimin.
Por, sa do të mbijetojë ky front opozitar dhe a mund të ketë fatin e njëjtë si i ashtuquajturi blloku VLAN i krijuar më 10 qershor të vitit 2014-të, i cili pas disa muajsh rezistence u prish?
Sipas analistëve dhe shoqërisë civile, partitë opozitare nuk po gjejnë rrugën e duhur e mekanizmat e duhur për të kundërshtuar qeverisjen me vendin. Sipas tyre, fronti opozitar pritet të ketë fatit e VLAN-it, sepse mund të funskionojë vetëm deri në zgjedhje, por jo edhe me shumë, sepse dy partitë më të vogla AAK-ja dhe NISMA shumë letë mund të kalojnë në qeveri.
Fidan Kalaja, nga Lëvizja FOL, thotë se opozita nuk po arrin të kuptojë atë që sipas tij është skenar i zëvendëskryeministrit Hashim Thaci, e të cilit po i bindet verbërisht kryeministri Isa Mustafa.
Kalaja, në një prononcim për portalin ‘Te Sheshi’, ka deklaruar se fitues, por “i pamoralshëm” i situatës politike në vend është ish-kryeministri Thaçi.
“Opozita me qasjen që ka, nuk është e bashkuar dhe nuk mund të jetë e tillë derisa ka interesa individuale brenda saj”, thekson Kalaja.
Njohësi i rrethanave politike, Kushtrim Gashi, mendon se do të përfundoj njëjtë sikurse blloku VLAN. Ai në një prononcim për ‘Te Sheshi’, ka thënë se opozita ka për qëllim që duke kanalizuar pakënaqësitë e qytetarëve dhe duke përfituar politikisht të mbajë gjallë elektoratin, apo në rastin më të mirë të arrijë deri të zgjedhjet e reja.
“Pika që do të prishë frontin opozitar nuk janë vetëm protestat e dhunshme, por edhe çështjet parimore e mosbesuese ndaj njëri-tjetrit. Deri dje VV i quante partitë tjera opozitare hajna të ligës se dytë, ndërsa sot kanë krijuar front opozitar, çfarë hipokrizie apo jo? Qytetarët nuk duhet tu përgjigjen thirrjeve të partive politike për protesta pa marrë parasysh se nga cila parti bëhen ato thirrje sepse partitë politike bëjnë protesta vetëm për interesa të tyre karrieriste e jo për qytetarët. Fatkeqësisht ne Kosovë po protestojnë ata që nuk do duhej të protestonin. Në emër të vlerave po flasin ata që nuk do të duhej të flisnin. Kundërvlerat janë duke mbizotëruar”, thekson Gashi.
Analisti politik, Islam Krasniqi, thekson se fronti opozitar është formuar për rrëzimin e qeverisë, dhe nuk pitet që për momentin të prishet, edhe pse kanë mosmarrëveshje rreth protestave.
Krasniqi thotë për ‘Te Sheshi’, se ky bllok mund të shkojë bashkë vetëm deri në zgjedhje, por jo edhe me shumë, sepse dy partitë më të vogla AAK-ja dhe NISMA shumë letë mund të kalojnë në qeveri po ju dha një mundësi sepse edhe qëllimi i tyre nuk është i sinqertë.
“AAK-së po ju ofrua posti i kryeministrit largohet pa menduar asnjë herë nga ky bllok sepse janë të etur për pushtet, ndërsa NISMA deri dje ishte në qeveri, por u prishen për interesa personale me bashkëpartiakët e vetë dhe krijoi një parti politike për ta rrëzuar partinë në pushtet. VV i mbetet që ta marrë peshën e opozitës mbi supet e veta sepse në politikë nuk ka sinqeritet”, shprehet Krasniqi. /tesheshi.com/
