Nga Donat Maloku
Vlerësimi i punës së çdo qeverie bëhet me qëllim që të përmirësohet qeverisja në çdo sektor, pas performancës jo të mirë që tregojnë ministrat përkatës.
Edhe në Kosovë, disa here është bërë riformatimi i qeverive, por, në Qeverinë e Kosovës zakonisht janë ndërruar veç emrat, sa për të thënë se po ndodh një reformatim, pasi rezultatet kanë mbetur të njëjta.
Praktikat në qeveritë e kaluara kanë treguar se janë larguar ministrat që kanë qenë më aktiv në punën e tyre dhe në pozita kanë mbetur njerëz të afërt me liderët e partive, apo ministrat që kanë dështuar në udhëheqje.
Më shumë se pesë muaj pas formimit të Qeverisë Mustafa, zërat e parë për ndryshim të ministrave kanë dalë pikërisht nga deputetë të Kuvendit të Kosovës.
Njohës të rrethanave politike në vend, përfaqësues të shoqërisë civile dhe deputetë mendojnë se duhet të bëhet performanca e secilit ministër në mënyrë që ata të mos mbesin në karrige katër vite pa arritur asnjë rezultat.
Jetmir Bakija nga Instituti Demokratik i Kosovës (KDI), thotë se nuk ka ndonjë dallim të Qeverisë Mustafa nga Qeveria Thaçi në asnjë sektor kryesor. Bakija thekson se në Qeverinë Mustafa ka vërejte dhe një dinamikë të ngadaltë të mbledhjeve të Qeverisë ku do duhej të shqyrtohen dhe merren vendime për politika publike që ofrojnë zgjidhje për këto punë.
“Performanca e ministrave duhet të matet në baza vjetore dhe të ketë një vlerësim sepse Kosova ka vuajtur nga shumë ministra të papërgjegjëshëm me poste publike dhe me performance të dobët. Duhet të instalohet një sistem i vlerësimit të ministrave që i nxit të punojnë sa më efektshëm sepse jemi prapa shumë në zhvillim të vendit qoftë në rajon apo edhe më gjërë”, ka deklaruar Bakija për portalin “Te Sheshi”.
Ish ministri i Tregtisë dhe Industrisë, tani anëtarë i Aleancës Kosova e Re (AKR), Ismet Mulaj ka thënë për portalin mbarëkombëtar “Te Sheshi”, se duhet të ketë vlerësim të performancës për secilin ministër, duke thënë se është e padrejtë që vendi të ketë ministra apatik deri në fund të mandatit.
“Kjo qeveri më shumë është marrë me vetveten se sa me zgjidhjen e ndonjë halli të qytetarëve të Kosovës. Mbi pesë muaj e asnjë njohje e re. Kjo më së miri e tregon punën e Qeverisë. Për mendimin tim z. Avdullah Hoti dhe z. Valon Murati kanë shpalosur ide, por të cilat ende nuk i kanë konkretizuar në veprime konkrete”, ka thënë Mulaj.
Deputeti i pavarur, Shaip Muja, në një nga seancat plenare të Kuvendit të Kosovës ka kërkuar nga Qeveria Mustafa të bëjë performacën e secilit ministër dhe ata të mos mbesin në pushtet katër vite aq sa është mandati i Qeverisë, por të vlerësohet puna e tyre.
“Të mbushet Qeveria me femra sepse kanë dhënë rezultate më shumë se burrat”, ka thënë deputeti Muja.
Njohësi i rrethanave politike në Kosovë, Faik Krasniqi thotë se edhe nëse bëhet riformatimi i Qeverisë, nuk do të kishte dobi pasi gjërat e mëdha që janë shtysë për zhvillim ekonomik dhe zbutje të papunësisë, ekzekutivi nuk i përfill dhe nuk i realizon!
“Kam shumë pak shpresë që kjo Qeveri do të jetë e sukseshme dhe do ta luftojë korrupsionin, krimin e organizuar, kontrabandën, informalitetin dhe do të ketë sukses në rimëkëmbjen e ekonomisë dhe zbutjen e papunësisë! Këta na e dëshmuan se çfarë janë në gjendje t’i bëjnë shtetit, ta shkatërrojnë dhe degradojnë deri në themel!”, është shprehur Krasniqi për portalin “Te Sheshi”.
Analisti politik, Blerim Burjani thotë se ministrat e Qeverisë Mustafa ende nuk po munden të konsolidohen në pozita të tyre.
“Një pjesë e ministrave këtë post e kanë marr edhe pa e ditur se do të angazhohet në ndonjë dikaster. Deri tash duket se ministri Avdullah Hoti i Financave është me aktiv në media por kjo nuk do të thotë gjë. Edhe pse realisht më aktiv duhet të jetë ministri i Ekonomisë, por kjo nuk po ndodh deri më tash. Ende liderët e të dy subjekteve duken të jenë më të zëshmit në këtë qeveri, Mustafa dhe Thaçi”, ka deklaruar Burjani. /tesheshi.com/
