Përgatiti: Artlind Reçi
Marrëveshja e arritur mëngjesin e së mërkurës në Shkup mes lidërve kryesore maqedonas, të pushtetit dhe e opozitës, nuk është dhe aq për t`u duartrokitur, sidomos nga shqiptarët. Këta të fundit pothuajse nuk ekzistojnë në asnjë pikë të marrëveshjes si “çështje” politike apo shoqërore. Orët që kanë pasuar marrëveshjen e proklamuar me bujë të madhe – ngase parashikohej dorheqja e Gruevskit si strumbullar – e ka kthjelluar akoma më shumë faktorin shqiptar për ta parë marrëveshjen me sy dëshpërues.
Kështu mendon analisti politik, Ibrahim Mehmeti:
“Zakonisht thuhet se marrëveshjet e arritura në negociata i lënë njësoj të pakënaqura të dyja palët negociuese, mirëpo me rëndësi është që kjo marrëveshje shënon fillimin e fundit të një krize e cila kërcënon stabilitetin e vendit. Ndërkohë, ajo që këtë marrëveshje e bën edhe më komplekse është se në të nuk u përfshihen çështje të cilat do t’i adresonin edhe pakënaqësitë e shqiptarëve.
Elita politike shqiptare edhe kësaj rradhe dëshmoi se nuk ka kapacitete negociuese dhe se partitë shqiptare nuk po arrijnë të dalin jashtë hijes së partnerëve të koalicionit nga kampi politik maqedonas”.
Më tej ai shton:
“Është për t’u habitur që edhe ndërmjetësuesit ndërkombëtarë e kanë pranuar qasjen e partive maqedonase se çështjet ndëretnike duhet të lihen mënjanë. E habitshme ngase mirëfilli dihet se zgjidhjet parciale nuk mund të ofrojnë rezultate afatgjatë. Megjithatë, përgjegjësinë për këtë strategji e kanë partitë pjesëmarrëse, në veçanti ato shqiptare.
Nga ana tjetër, ish-diplomati Arsim Zekolli është shprehur troç dhe ashpër: “Në emër të proceseve euro-integruese , SHBA dhe BE kanë legjitimuar krimin dhe korrupsionin, ka thënë ai.
Marrëveshjen në fjalë e ka komentuar edhe një nga drejtuesit e lëvizjes Besa, Afrim Gashi, i cili mes tjerash ka thënë:
“Pas 24 prillit, kushdo që do t’i fitojë zgjedhjet, do të mundet të vazhdojë lirshëm pa asnjë problem ta përkryejë keqmenaxhimin e shtetit, të cilin Gruevski e aplikoi përgjatë këtyre 10 viteve.
Ne si lëvizje opozitare kemi kërkuar që të krijohen kushte fair dhe demokratike për mbajtjen e zgjedhjeve, por asnjë pikë e marrëveshjes nuk na jep të besojmë se do të kemi zgjedhje të tilla. Partitë në pushtet do të vazhdojnë ta keqpërdorin pozitën e tyre, do të shantazhojnë dhe do t`ju bëjnë presion qytetarëve që t’i votojnë ata, ndërsa vjedhja e parave publike dhe e votave do të vazhdojë të jetë dukuri edhe në zgjedhjet e ardhme. Shqiptarët jo që nuk fituan asgjë, por me këtë marrëveshje kanë humbur shumë”.
Ndërkohë është shkuar dhe më tej, kur sekretari partisë tjetër opozitare, Arben Taravari, parti që drejtohet nga Zijadin Sela, ka bërë thirje për një front të përbashkët gjithshqiptar, ‘Aleanca për shqiptarët’:
“Na u lidh pakti pozitë-opozitë maqedonase, se shqiptarët janë kamarierë që iu shërbejnë “Të Mëdhenjve”! Ne as nuk hymë si problem dhe as nuk dolëm si zgjidhje. Fare! Hiç! Zoran Zaevi, ky sllav elokuent, u dëgjua të kumtonte plot emocion lajmin e Marrëveshjes, po për hallet e shqiptarëve që i kishte shqetësim që nuk e zinte gjumi natën, nuk foli një llaf, fare zë, sikur të mos i kish përdor asnjë ditë të fushatës së tij anti-qeveritare ose fushatës për të mbërritur në pushtet! Si mundet këta shqiptarë që drejtojnë fatet tona, të kenë qëndruar të qetë kur kanë dëgjuar që nuk do të bëhet asgjë për rastin e Sopotit, asgjë për Mostrën, asgjë për Kumanovën, asgjë për shpalljen e shqipes si gjuhë zyrtare, asgjë për buxhetin proporcional, asnjë prej ministrive kyçe!”, ka thënë Taravari. /tesheshi.com/
