Nga Blendi Gashi
Kosova është e pavarur, është shtet më vete, mirëpo është e “çarmatosur”, sepse nuk ka ushtri, dhe se po e ka të vështirë ta formojë atë, pikërisht për shkak të pakicës serbe, që siç thuhet në një shprehje popullore, “ia ka vënë kufirin tek thana”. Vetë qeveria Kosovës, e ka pranuar si problem të madh mosgjendjen e një rrugëzgjidhjeje për transfromimin e Forcës së Sigurisë së Kosovës në Forca të Armatosura të Kosovës.
Ka qenë personalisht kryeministri, Isa Mustafa, që ka pranuar të shtunën në mëngjes se nuk po mundet të gjejë një zgjidhje të pranueshme për shumicën lidhur me themelimin e Ushtrisë së Kosovës.
Partitë opozitare mendojnë se drejtuesit e qeverisë janë duke planifikuar të bëjnë kompromisin e radhës me Serbinë në dëm të Kosovës, sepse dihet mirë se pa votat e Listës Serbe nuk themelohet ushtria.
Njohësit e rrethanave politike në vend, bëjnë përgjegjës kryesor për dështimin e themelimit të ushtrisë ish-kryeministrin, Hashim Thaçi dhe kryeministrin actual, Isa Mustafa.
Kryeministri Isa Mustafa, përmes një postimi bërë në llogarinë e tij në Facebook, ka thënë se shkak për këtë është komuniteti pakicë (Lista Serbe), që po kundërshtojnë themelimin e Ushtrisë së Kosovës. Ai ka thënë se nuk është penduar që nuk i kishte pranuar vendet e rezervuara edhe për një mandat për pakicat në këmbim të themelimit të ushtrisë së Kosovës:
“Sa i përket transformimit të FSK-së në Forcë të Armatosur, për mua ka qenë dhe është e pajustifikueshme që të ndërlidhet me kontekstin e vazhdimit të vendeve të rezervuara. Sepse këto vende nuk mund të afatizohen. Ajo që ndryshohet në Kushtetutë me dy të tretat e dyfishta, nuk mund të ndryshoj në të ardhmen pa të njëjtin parim. Së fundmi kjo do të na shtynte në një cikël të kushtëzimeve, nga i cili vështirë se do të gjenim rrugëdalje. Ndërkaq, pavarësisht propagandës që po bëhet,unë jam duke punuar shumë me të gjithë për të gjetur zgjidhje për transformimin e FSK-së. Vetëm gjatë dhjetë ditëve të kaluara i kemi pasur pesë takime me partner të koalicionit dhe’ faktorët ndërkombëtar dhe me strukturat më të larta të FSK-së për të gjetur zgjidhje”, ka deklaruar kryeministri Mustafa.
Zafir Berisha, deputet i partisë Nisma për Kosovën, njëherit anëtar i Komisionit parlamentar për siguri dhe mbikëqyrjen e Forcës së Sigurisë së Kosovës, ka thënë për portalin “Te Sheshi”, se formimi i ushtrisë nuk duhet kuptuar në formën e lëshimeve tjera që kjo qeveri i bënë Serbisë, ku shtetin gjithnjë e më shumë janë duke e bërë jofunksional dhe i cili nuk garanton stabilitet as për vete e aq më pak për rajonin.
“Ushtria e Kosovës nuk bëhet me tryeza e deklarata, por bëhet me ngritjen e buxhetit 300% dhe me ngritjen e kapaciteteve profesionale, si dhe me armatim modern e cila mund të garojë me ushtritë në rajon dhe vetëm kështu mund të garanton sovranitetin e vendit dhe mnd të prodhon paqe në rajon dhe më gjerë. Ndryshe kjo garniturë kriminale e korruptuar nuk bën ushtri, sepse janë futur në ujëra të turbullta duke dëmtuar imazhin dhe perspektivën e vendit. Këta banditë institucional ngulin këmbë në emër atëherë dihet se këta kanë plan të bëjnë kompromisin e radhës me Serbi në dëm të Kosovës, sepse dihet mirë se pa votat e “Listës Srbska” nuk kalon, për aq sa ka kaluar ligji për Festat Zyrtare i cila ka mbetur në sirtarët e Kuvendit duke u pluhurosur”, ka deklaruar Berisha.
Riza Smaka, zyrtar i Aleancës për Ardhmërinë e Kosovës (AAK) në një prononcim për ‘Te Sheshi’, ka deklaruar se qeveria aktuale ka bërë shumë konçesione në disfavor të interesit kombëtar. Sipas tij, Lista Serbe nuk do të votojë formimin e Ushtrisë dhe kjo Listë çdo çështje delikate do ta kapitalizojë për interesat e veta megalomane.
“Është vështirë të besohet se Ushtria do të themelohet këtë vit, pasi Srpska instruksionet i merr nga Beogradi, dhe e kanë mundësinë që shpesh ta bllokojnë Kuvendin”, ka deklaruar Samaka.
Njohësi i rrethanave politike në Kosovë, Albinot Maloku, thotë se moszgjidhja e çështjes rreth transferimit të Forcës së Sigurisë së Kosovës në Forca të Armatosura të Republikës së Kosovës, para së gjithash është paaftësi e ish-kryeministrit Thaçi dhe e kryeministrit Mustafa, që duke e pa situatën në terren, duhej ta shfrytëzonin momenti për mbarimin e kësaj çështjeje. Ai thotë se nuk duhet çuditur me pengesat që i krijon Lista Serbe, pasi ata nuk e njohin shtetin tonë.
“ Ne e dimë dhe nuk ka nevojë që kryeqeveritari Mustafa t`i mbaj leksione popullit se çfarë Kushtetute ka Kosova, dhe se si paska qenë ai e partia e tij “kundërshtuese” për vendet e rezervuara dhe pozitën garantuese të pakicave për të qenë obstruksionist në çdo çështje delikate për shtetin. Ishte premtim dhe duhet të mbahet. Nëse Isa Mustafa nuk mund të gjejë zgjidhje, prapë ka zgjidhje, ai mund të jap dorëheqje. Edhe ashtu atë pozitë nuk e ka fituar me meritë. Nëse flasim për kërkesat e Listës Serbe dhe të Serbisë, ato kanë qenë e do të jenë kërkesa të pangopshme deri në irracionalitet”, thotë Maloku.
Ndryshe, themelimi i Ushtrisë së Kosovës kërkon shumicën e dyfishtë të votave në Kuvend, që i bie se pa shumicën e votave të komuniteteve pakicë, Forcat e Armatosura nuk do të mundë të kalojnë në Kuvend. /tesheshi.com/
