Nga Donat Maloku
Zgjedhjet e reja nacionale në Kosovë janë të parapara të mbahen në vitin 2018. Por, rrethanat politike mund të diktojnë kohën e mbajtjes së tyre.
Çdo ditë e më shumë po shtohet zërat se Kosova do të shkoj në zgjedhje të parakohshme në fillimvitin e ardhshëm.
Në rast se nuk zbatohet marrëveshja PDK-LDK, dhe lideri i PDK-së Hashim Thaçi nuk zgjidhet president i Kosovës, zgjedhjet shihen si të pashmangshme.
Vetë drejtuesit më të lartë të PDK-së kanë bërë të qartë dhe në një mënyrë haptazi kanë ‘kërcënuar’ partnerin qeverisës LDK-në se koalicioni prishet nëse lideri i tyre nuk bëhet kryetar i shtetit.
Analistët mendojnë se nëse nuk respektohet marrëveshja mes dy partive në koalicion PDK-LDK, dhe Thaçi nuk bëhet president, qeveria do të bie dhe vendi do të shkoj në zgjedhje të parakohshme. Pavarësisht se kur do të mbahen zgjedhjet, sipas tyre interesimi i qytetarëve për të marrë pjesë në votime pritet të jetë më i vogël.
Analisti Emrush Ujkani në një prononcim për portalin “Te Sheshi”, ka thënë se nëse partnerët e koalicionit nuk tregojnë gatishmëri për t’i përmbudhur detyrimet e tyre si partner koalicioni, është shumë e lehtë të ndodh edhe mosvotimi I Hashim Thaçit për president të vendit. “Veçanërisht votat e LDK-së mund t’i kontribuojnë këtij skenari pasi që në këtë parti ka një numër të deputetëve që nuk janë të gatshëm të votojnë z.Thaçi për president.
Kurse, sa i përket asaj se cila parti do të dilte fituese e zgjedhjeve nëse vendi shkon në zgjedhje të parakohshme, Ujkani ka deklaruar se është vështirë të parashikohen rezultatet. “Interesimi i qytetarëve për zgjedhje mendoj është shumë i ulët dhe në anën tjetër nuk është që ka ndonjë ofertë konkrete për qytetarin, por për këto të gjitha ndoshta duhet pritur kohën e duhur për të folur”, është shprehur Ujkani.
Fatmir Sheholli, analist tjetër ka deklaruar për portalin “Te Sheshi”, se nëse nuk implementohet marrëveshja në mes të dy partive në koalicion, PDK -LDK, është e natyrshme që të kemi zgjedhje të jashtëzakonshme parlamentare. Lidhur me sondazhet e fundit të bëra, ai ka thënë se ato janë pjesë e demokracisë dhe si të tilla duhet analizuar po jo edhe të mirren ashtu siq paraqiten, sepse përvoja ka treguar se jo rrallë herë “ja kanë huq”.
Sheholli mendon se nëse opozita e tanishme aktuale “Vetëvendosje”, AAK dhe Nisma arrijnë marrëveshje të jenë në një listë zgjedhore, atëherë definitivisht do të ketë një pasqyrë tjetër qeveritare në zgjedhjet e ardhshme, në të kundërtën nuk pret ndryshime të mëdha në skenën politike të Kosovës. “Nëse do të kemi një listë zgjedhore VV, AAK dhe Nisma atëherë konsiderojë që ajo listë zgjedhore do të ketë më së shumti ulëse në Kuvendin e Kosovës”, ka deklaruar Sheholli.
Edhe njohësi i rrethanave politike në vend, Faik Krasniqi, thotë se PDK-ja e Thaçit gjatë vjeshtës pritet ta prish koalicionin dhe vendin ta dërgojë në zgjedhje, për t’i fituar bindshëm ato, pasi sipas tij njerëzit e LDK-së e varrosën këtë parti në Kuvendin e fundit.
“Hashim Thaçi dhe PDK-ja do ta dërgojnë vendin në zgjedhje. Hashim Thaçi liderët dhe partitë aktuale në Kosovë, as që i bën llogari si rival që ia rrezikojnë pushtetin!.
Me një LDK që u ‘varros’ përfundimisht të dielën, me një ‘Vetëvendosje’ që nuk po ndryshon dot ideologjinë politike, me një AAK që nuk po reformohet për ta pasuruar partinë me intelektualë të mirëfilltë, dhe me një Nismë për Kosovën që mezi e kaloi pragun, kurdo që të mbahen zgjedhjet në Kosovë, e që sipas të gjitha gjasave dhe për qindra arsye pritet të mbahen gjatë këtij viti ose në fillim të 2016, sepse i levërdis PDK-së. Hashim Thaçi i deklason të gjithë këto parti që janë aktualisht në skenën politike, madje duke fituar 50% të votave dhe nuk do t’i duhen asnjëra nga këto parti për të bërë koalicion!”, deklaroi Krasniqi për portalin “Te Sheshi”.
Ndryshe, sondazhe të ndryshme që janë bërë kohëve të fundit tregojnë se nëse do të mbaheshin zgjedhjet nacionale në fillimvitin e ardhshëm skena politike do të pësonte ndryshime. /tesheshi.com/
