Nga Donat Maloku
Shpërthimi i pakënaqësive të qytetarëve, që ndërlidhet me gjendjen e rëndë në vend që ka kapluar çdo sferë të jetës si pasojë e keqqeverisjeve, që kulmuan me koalicionin e dy partive,që mbajnë përgjegjësinë për shumë dështime në Kosovë, mund ta vë në rrezik qeverinë aktuale të udhëhequr nga dy partitë më të mëdha PDK-LDK.
Mospërfillja e zotimeve dhe të premtimeve zgjedhore, adresuar votuesve dhe opinionit publik, bën që shumë qytetarë të ikin ilegalisht nga vendi.
Njohësit e rrethanave politike në vend pohojnë se partitë që po qeverisin vendin janë fajtorët kryesorë për gjendjen e vështirë sociale në vend dhe assesi nuk mund të kthejnë shpresën tek qytetarët e zhgënjyer. Sipas, tyre, alternativa e vetme e përkohshme do të ishte krijimi i një qeverie ekspertësh deri në shpalljen e zgjedhjeve të parakohshme, pasi është vështirë të qeveriset vendi nga grupacione politike të natyrave të kundërta.
Publicisti dhe analisti politik Faik Krasniqi, vlerëson se zgjidhja më e mirë për vendin është largimi nga skena politike, e gjithë kastës së vjetër politike, të cilët janë fajtorët kryesorë për gjendjen e rëndë ekonomike në vend. Krasniqi në një prononcim për portalin mbarëkombëtar “Te Sheshi”, ka thënë se deri në përgatitjen eventuale të zgjedhjeve të parakohshme, do të ishte në të mirë të vendit të kishim një qeveri ekspertësh.
“Kjo klasë politike, me përjashtim të disa politikanëve është e tejkriminalizuar, e konsumuar, e korruptuar, analfabete, injorante dhe të tillët janë fajtorët kryesorë për gjendjen e rëndë në Kosovë dhe penguesit e moszhvillimit të shtetit, ekonomikisht, politikisht etj. Në situatën e rëndë ekonomike dhe politike në të cilën ndodhet Kosova, fatkeqësisht, nuk është zgjidhje largimi nga pushteti i partive që janë pushtet dhe ardhja në pushtet të partive opozitare. Por, zgjidhja është që të largohet nga skena e gjithë kasta e vjetër politike, e cila është fajtore kryesorë për gjendjen e rëndë ekonomike, politike dhe në çdo sferë të jetës. Këtij vendi i duhet gjak dhe mish i ri i gjallë, klasë e re politike, pa hipokrizi dhe jomashtruese, e padjallëzuar dhe e pakriminalizuar”, ka deklaruar Krasniqi për portalin “Te Sheshi”. Sipas tij deri në përgatitjen e zgjedhjeve të parakohshme, do të ishte në të mirë të vendit të kishte një qeveri ekspertësh.
Ish-deputeti i Kuvendit të Kosovës, Dirton Tali, thotë se në shoqëritë në tranzicion dhe të pakonsoliduara, zgjedhjet e shpeshta janë të natyrshme por edhe të shëndetshme, edhe ahëherë kur kemi të bëjmë me koalicione të grupacioneve politike të natyrave të ngjashme, e lëre më me koalicione të ndërtuara mbi grupacionet politike të natyrave të kundërta. “Se sa jo natyror është ky koalicioni aktual e pasqyroi shumë mirë intervista e z.Fatos Klosi. Edhe sot kemi reagime “armiqësore” të ndryshme nga të dy taborret – edhe nga ata që thirren në rugovizëm edhe nga ata që thirren në UCK, të cilët e akuzojnë dhe ofendojnë njëri- tjetrin. Andaj, çfarë rezultate mund të priten nga një koalicion i tillë, i cili është ndërtuar në bazë të këtij realicioni jo miqësor?”. Unë nuk pres që kjo qeverisje do të ndryshojë realisht situatën. Andaj edhe zgjedhjet e reja të parakohëshme apo edhe një qeveri teknike do të mund të ishin alternative”, ka deklaruar Tali për portalin ‘Te Sheshi’.
Analisti Blerim Burjani, vlerëson se për t`u përmirësuar gjendja e rëndë që ka kapluar çdo sferë të jetës, si alternative e vetme po shihet të ndërtohet një qeveri e gjerë ekspertësh.
“Faza e krijimit të një qeverie teknike të përbërë vetëm nga ekspertët të cilët do te merreshin vetëm me konsolidimin e shtetit , një mandat i një qeverie të tillë katërvjeçare do të merrej me një program konsolidimi institucional, kjo fazë do të pastronte shtetin nga njerëz të shumtë që kanë keqpërdor shtetin për qëllime personale dhe grupore e partiake, regjionale dhe do të kthehej në binarë zhvillimi institucional me njerëz të përkushtuar për punën e tyre dhe me meritat që kanë mbërri deri me tash. Kjo fazë është e ndjeshme dhe për këtë do të kërkohej që subjektet e sotme që janë në parlament të pajtohen me një qeverisje të tillë kalimtare, e që shtetin do konsolidonte në periudhën katër vjeçare, pra do të kryente një reformë të plotë institucionale. Konsolidimi apo reformimi institucional duhet të përfshijë të gjitha nivelet institucionale pra administratën publike, sektorin e arsimit universitar ,fillor dhe atë të mesëm, gjygjësorin, prokurorinë, shërbimin civil, shërbimin konsullor dhe diplomatik. Shteti pas kësaj faze do të duhej të shkojë në zgjedhje të përgjithshme, pra pas një konsolidimi katër vjeçar”, deklaron Burjani. /tesheshi.com/
