Nga Donat Maloku
Ndihmëssekretarja amerikane për Çështje të Europës dhe Azisë, Viktoria Nuland, pasi ka takuar të premten krerët më të lartë shtetërorë, presidenten Atifete Jahjaga, kryeministrin Hashim Thaçi , kryekuvendarin Kadri Veseli dhe ministrin e Jashtëm Hashim Thaçi, raportohet prej tyre ka marrë premtimin për themelimin me patjetër të ‘Speciales’. Nuland citohet të ketë thënë se e për të ecur Kosova përpara duhet themeluar kjo Gjykatë.
Sipas disa analistëve, Nuland ua ka bërë të qartë krerëve të Kosovës se nuk kanë alternative tjetër përveç themelimit të Speciales, gjë që sipas tyre e tregon më së miri takimi i mbajtur me dyer të mbyllura.
Njohësi i rrethanave politike në vend, Blerim Burjani, thotë se Nuland ka lënë disa opsione, por të tipit “merr e zgjidh”, e njohur si “diplomaci e kryer”, që detyron partitë politike vetëm të zgjedhin më lehtë a më vështirë. “Opsionet janë ngushtuar. Krenaria dhe lufta për pushtet po veprojnë paralel. Pozitive është që prej aprovimit të Gjykatës Speciale nga Kuvendi të votohet edhe FAK, që është epilogu i plotë i kësaj shtyerje dhe krenarie në mes partive politike në Kosovë”, ka deklaruar Burjani për portalin ‘tesheshi.com’.
Analisti Islam Krasniqi, thotë se vizita e Nuland në Kosovë është bërë me një mesazh të qartë së patjetër duhet të themelohet ‘Specialja’, mirëpo për t`u dukur me peshë me të vogël, në deklaratën lidhur me ketë çështja ajo nuk e përmendi Gjykatën Speciale, ndoshta vjen këtu për shkak të dialogut.
“Takimi i saj i mbajtur me krerët e shtetit tonë me dyer të mbyllura tregon qartë së presioni çdo herë vjen e rritet, ku kjo punë është e kryer, mirëpo votat për ndryshimin e amendamentit kushtetues bëhet vetëm për poena politike të disa ideve të caktuar lidhur me bashkësinë ndërkombëtare. Ndihmëssekretarja e Amerikës ka thënë së ne i kemi zhgënjyer kur nuk i kemi votuar këto amendamente, sepse themelimi i Gjykatës sipas saj, do ta ndihmojë Kosovën dhe SHBA-në që Kosova të ecë përpara. Pa dyshim së kjo vizitë do të jetë çelës për këtë çështje, sepse është punë e kryer: do të ndryshohet amendamentet dhe do të themelohet Gjykata Speciale. Edhe pas gjithë këtij presionit kaq të madh nga bashkësia ndërkombëtare, ia ka vlejtur refuzimi i saj nga deputetët, si shenjë pjekurie se jo patjetër duhet të pranohet gjithçka e gatuar nëpër tryeza avropiane”.
Kushtrim Gashi, analist tjetër nga Prishtina, thotë se Nuland ua ka bërë me dije krerëve të shtetit se ‘Specialja’ duhet të riprocedohet sa më parë në Kuvend dhe të aprovohet, dhe se assesi nuk bën që të refuzohet. “Nuland u ka thënë troç se nëse e refuzojnë edhe për herën e dytë Gjykatën Speciale, pa mëdyshje që ketë do ta bën OKB-ja dhe SHBA nuk do ta pengojë një rezolutë të sponsorizuar nga Rusia dhe Kina. Ua ka bërë të qartë edhe pasojat tjera të mundshme që mund të kenë lidhje me integrimet euro-atlantike, si dhe rrezikun e humbjes se mbështetjes amerikane. Një rezolutë e miratuar nga Këshilli i Sigurimit të OKB-së do të mund të përmban kapituj mbi gjenocidin dhe fuqizon UNMIK-un dhe rezolutën 1244 dhe në këtë formë do ta cënonte shtetin e Kosovës. Hartimin dhe miratimin e një rezolute në OKB do të ia mundësonte neni 41 i kartës se OKB-së në bazë të të cilit janë krijuar gjashtë tribunale dhe të cilat kanë funksionuar sipas të drejtës ndërkombëtare. Mesazhi i Nuland do të jetë shumë i fuqishëm dhe i qartë për lidershipin e vendit se rrugë tjetër nuk do të ketë pos miratimit te amendamenteve kushtetuese që i hapin rrugë formimit të Gjykatës Speciale. Me a po pa dëshirën tone, Gjykata Speciale shumë shpejt do të themelohet, duke u përmbushur kështu një obligim shumë i rëndësishëm ndërkombëtar”, ka deklaruar Gashi.
Pritet pra që Kuvendi këtë javë të riprocedojë amandamentet për ndryshimin e Kushtetutës, që do t’i hapte rrugë themelimit të ‘Speciales’. /tesheshi.com/
