Nga Donat Maloku
Themelimi i Asociacionit të Komunave me shumicë serbe, pritet javën e ardhshme të jetë në tryezën e bisedimeve në mes delegacionit të Kosovës dhe Serbisë.
Prishtina zyrtare insiston se Asociacioni nuk do të ketë kompetenca ekzekutive duke thënë se do të themelohet dhe do të funksionojë plotësisht në pajtim me kushtetutën dhe ligjet e Kosovës.
Drejtori i zyrës për Kosovën në Qeverinë e Serbisë, Marko Gjuriq, ka thënë se përfaqësuesit e Beogradit në bisedimet që do të mbahen me Prishtinën në javën e ardhshme në Bruksel, shkojnë me synimin që të krijojnë Asociacionin e Komunave me shumicë serbe për serbët që jetojnë në Kosovë. Gjuriq pas një takimi që ka mbajtur me përfaqësuesit e komunave me shumicë serbe në Kosovë, ka deklaruar se delegacioni serb në bisedimet e Brukselit do ta arsyetojë besimin që serbët e Kosovës ia kanë dhënë qeverisë serbe.
Por, si e shohin subjetet opozitare dhe analistët politikë themelimin e këtij Asociacioni. Ata kërkojnë nga Qeveria e Kosovës të mos e kalojë kufirin duke thënë se Asociacioni nuk duhet të ketë kompetenca ekzekutive, pasi thonë se nëse ndodh e kundërta do të ketë bosnjëzim faktik të Kosovës.
Analistët kritikojnë Qeverinë për mbyllje dhe mostransparencë karshi këtij procesi, por sipas tyre kjo vërteton pafuqinë e ekzekutivit siç thonë në krijimin e një krijese me përmasa shkatërruese për shtetin tonë.
Muharrem Nitaj, zëdhënësi i partisë opozitare Aleanca për Ardhmërinë e Kosovës (AAK), në një prononcim për portalin “Te Sheshi”, ka thënë se kufiri që nuk duhet ta kalojë Qeveria e Kosovës është që Asociacioni i Komunave Serbe, në asnjë situatë dhe me asnjë çmim, nuk duhet të ketë kompetenca ekzekutive.
“Në një situatë të tillë pasojat do të ishin të pariparueshme për Kosovën. Asocicioni nuk mund dhe nuk duhet ta rrezikojë rendin kushtetues dhe organizimin shtetëror të Kosovës. Kam përshtypjen se Kryeministri Mustafa nuk është transparent sa duhet kur flitet për Asociacionin dhe për marrëveshjen që duhet të nënshkruhet javën e ardhshme. Ai e ka për obligim ta njoftojë opinionin por edhe Kuvendin se çkado të nënshkruhet”, ka deklaruar Nitaj.
Politilogu, Nexhmedin Spahiu, ka deklaruar për “Te Sheshi”, se është shqetësuese mungesa e transparences nga ana e Qeverisë karshi themelimit të Asociacionit të Komunave serbe, duke thënë se në terr vetëm gjëra të këqija e të turpshme zhvillohen. “Fuqitë ekzekutive të Asociacionit kishin me qenë bosnjëzim faktik i Kosovës”, shprehet Spahiu.
Analisti, Blerim Burjani, thotë se Kosova nuk mund të lejojë në asnjë variant kompetenca ekzekutive që do të thoshte të bie ndesh me Kushtetutën e Kosovës dhe ligjin për vetqeverisje lokale.
“Asociacioni duhet të jetë thjesht mekanizëm konsultativ për zhvillimin e pushtetit lokal të tipit të një mekanizmi rekomandues dhe zhvillues . Çdo kompetencë tjetër e dhënë do të nënkuptonte rrezikun për riorganizim kushtetues të vendit, kjo nuk është e pranushme”, ka deklaruar Burjani për portalin “Te Sheshi”.
Ai thotë se mungesa e transparencës për Asociacionin është loja kryesore strategjike e Qevrisë së Kosovës, njëjtë si ka ndodh edhe me të gjitha marrëveshjet e tjera, ku është thënë diç tjuetër dhe në fund të dialogut janë pranuar compromise të dhimbshme nga Kosova.
Njohësi i rrethanave politike, Florim Zeqa, shprehet se vendimi për themelimin e këtij Asociacioni fatkeq për Kosovën është marrë në Bruksel në marrëveshjen e 19 Prillit të vitit 2013 mes ish kryeministrave Hashim Thaçi eIvica Daçiq, e ratikfikuar edhe në Kuvendin e Kosovës me 27 Qershor po të njëjtit vit, në emër të “normalizimit” të marrëdhënieve ndërmjet Kosovës dhe Serbisë !
“Sa u përket kufijëve apo vijave të kuqe të cilat Qeveria e jonë nuk do duhej t’i kalojë në lidhje me këtë krijesë artificiale janë kompetencat ekzekutive të këtij Asociacioni dhe lidhja lineare me Beogradin në njërën anë, ndërsa në tjetrën me komunat, kishat dhe manastiret serbe në brendi të Kosovës, e cila gjë shkakton ndarjen gjeografike të Kosovës sipas parimit etnik dhe ndarjen e sovranitetit të shtetit tonë sipas orekseve të shtetit serb”, thotë Zeqa.
Kurse, lidhur me mostransparencën e Qeverisë për këtë proces, analisti Zeqa thotë se kjo gjë vërteton pafuqinëinë e ekzekutivit tonë në parandalimin e themelimit të kësaj krijese me përmasa shkatërruese për shtetin tonë. “Pas themelimit të këtij Asociacioni, shteti i Kosovës po dëmtohet në parim dhe përmbajtje, po shëndrrohet në formën që e ka dëshiruar Serbia; ‘Më pak Republikë e më shumë se Autonomi për shqiptarët e Kosovës””.
Edhe, Grupi për Studime Juridike dhe Politike kërkon nga Qeveria e Kosovës që të jetë e kujdesshme në procesin e dialogut në lidhje me . Po ashtu, GSJP shpreh brengën për mungesën e transparencës, informimit dhe mbylljen e plotë të Qeverisë në raport me kornizën mbi të cilën kjo e fundit po e planifikon themelimin e Asociacionit. GSJP kërkon nga Qeveria e Kosovës që t’i përmbahet kufijve kushtetues dhe parimeve të cilat do të garantojnë që Asociacioni të mos shndërrohet në mjet të ndarjes etnike të Kosovës .
Ndryshe, Lëvizja “Vetëvendosje”, ka zhvilluar të enjten një aksion ku u ka bërë thirrje sërish qytetarëve që t’i bashkohen organizimeve, tubimeve të saj, për të parandaluar krijimin e Asociacionit të Komunave Serbe, ose, siç e kanë quajtur ata, të “Zajednicës”. Aktivistët e VV-sëv kanë zbuluar një afishe para hyrjes së Kuvendit, në të cilën kanë ilustruar Kosovën në dy mënyra: “Kosova pa Zajednicë”, si një tërësi e vetme, dhe “Kosova me Zajednicë”, e copëtuar. /tesheshi.com/
