Nga Donat Maloku
Mungesa e sundimit të ligjit, (mos)luftimi i korrupsionit dhe krimit të organizuar, (mos)reforma në administratën publike, (mos)zhvillimi ekonomik, pritet të jenë sërish kritikat në Raportin e Progresit që do të publikohet këtë vit për Kosovën nga Komisioni Evropian.
Analistët thonë Raporti do të jetë tregues i situatës reale në Kosovë, ku përveç vërejtjeve do të përmbajë edhe sygjerime e rekomandime për vendin tonë se si të vazhdohet tutje.
Njohësi i Integrimeve evropiane, Artan Murati, njëherit magjistër i të drejtës së Bashkimit Evropian nga Universiteti i Salzburgut, ka thënë për portalin “Te Sheshi”, se Komisioni Evropian adreson përafërsisht vërejtjet e njëjta për Kosovën. Kjo, sipas tij dëshmon edhe ecjen e ngadaltë të Republikës së Kosovës drejt integrimit evropian.
“Konsideroj që përveç evidentimit të sukseseve të arritura, edhe sivjet Kosova do të marrë kritika, sidomos në fushën e sundimit të ligjit, reformës në administratë publike, zhvillimin ekonomik dhe mbrojtjes së të drejtave dhe lirive të njeriut. Poashtu, besoj që do të jetë e pamundur që Komisioni Evropian do ta anashkaloj bllokadën institucionale, e cila padyshim që ka kontribuar në ngadalësimin e zhvillimit më të shpejtë të proceseve. Ndërsa sa i përket themelimit të Gjykatës Speciale, ndoshta mund të përmendet në Raport, por nuk besoj që do t’i kushtohet vëmendje e madhe. Si zakonisht, edhe në këtë vit pres që Raporti i Progresit do t’i kushtoj vëmendje të posacme zhvillimit të dialogut me Beogradin, statusit të pakicave në Kosovë si dhe nivelit të demokracisë në institucionet e vendit, sidomos ne Parlament. Si përfundim, pres që Raporti i Progresit për vitin 2015 të jetë tregues i situatës reale në Kosovë, të cilën do ta konsideroja progresive, edhepse një rrjedhë më e shpejtë e ndryshimeve pozitive gjithsesi qe do të ishte e mirëseardhur. Poashtu, sikur çdo herë tjetër, pres që Raporti të përmbajë edhe sygjerime e rekomandime për Kosovën se si të vazhdohet tutje”, ka deklaruar Murati.
Njohësi i rrethanave politike, Fatmir Sheholli, ka deklaruar për portalin “Te Sheshi”, se edhe sivjet do të dominojnë vërejtjet për mosangazhimin e duhur të institucioneve rreth luftës kundër korrupsionit dhe krimit të organizuar.
“Do të kemi notë jo të duhur rreth mos miratimit të ligjeve në Kuvendin e Kosovës dhe gjithashtu notë jo të lakmueshme rreth përformancës së ministrave në Kuvendin e Kosovës në përgjigjet e deputetëve. Notë jo adekuate do jetë edhe bllokada gjashtë mujore e institucioneve të Kosovës. Ajo që vërehet vazhdimisht në keto raporte progresi është që Kosova nuk po bën hapa konkret në luftën kundër korrupsionit dhe krimit të organizuar”, ka deklaruar Sheholli.
Blerim Burjani, analist nga Prishtina, thotë se Raporti do të adresojë problemet e përvjetshme të Kosovës, duke shënuar një progres të limituar dhe me kërkesa shtesë.
“Kanë mbetur disa tema të paprekura dhe të paplotësuara nga Kosova, si qeverisja efektive, rendi dhe ligji, ndalimi i korrupsionit dhe shënimi i rezultateve konkrete ashtu si e ka potencuar edhe më herët BE, reformimi i administratës publike që do të thotë shkurtimet buxhetore etj. Në këtë raport mund të përmenden edhe sfidat e Kosovës siç janë progresi i vogël drejt ekonomisë së tregut, papunësia etj”, ka deklaruar Burjani, për portalin “Te Sheshi”.
Ndryshe, Komisioni Evropian është në fazën e mbledhjes së të dhënave të përformancës së institucioneve të Kosovës në adresimin e sfidave që rrjedhin prej raportit të kaluar. Brenda një muaji do të jetë një draft i parë, i cili do ta vlerësojë përfomancën e institucioneve.
Raporti final pritet të publikohet në muajin tetor. /tesheshi.com/
